OEKUSI, 08 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, sei komunika ho ekipa husi Institutu Jestaun Ekipamentu no Apoia Dezenvolvimentu Infraestrutura, Institutu Públiku (IGEADI,I.P) atu loke estrada ba abitante sira iha bairru izoladu Biele, iha suku Bene-Ufe sub-rejiaun Nítibe.
Notísia relevante:Uma-kain 100-resin iha suku Bene-Ufe Nítibe seidauk asesu liña eletrisidade
Prezidente Autoridade RAEOA, Rogério Tiago Lobato, informa asuntu ne’e, hodi responde preokupasaun abitante Biele, tanba dezde tempu okupasaun to’o ohin loron abitante uma-kain 27 ho populasaun 74 seidauk asesu estrada, inklui liña eletrika no fasilidade saúde.
“Ha’u simu ona rekomendasaun sira husi komunidade Biele, ne’e programa ida husi kedas tinan kotuk 2024, ne’ebé ha’u esforsa atu tinan ne’e, ita komesa loke husi parte Lamasin, depois ha’u sei ko’alia ho tékniku sira iha Diresaun Rejionál Infraestrutura atu loke estrada ne’e labele liuhusi rai-lolon liu. Importante mak ne’e, tinan ne’e tenki rezolve atu fasilita komunidade iha Biele bele asesu ona dalan mai sentru suku Bene-Ufe,” Lobato, informa iha suku Bene-Ufe, foin lalais ne’e.
Nia esplika, projetu loke estrada foun ne’e, la integra iha projetu Konsellu Administrasaun Fundu Infraestrutura (KAFI), maibé parte husi projetu emerjénsia ne’ebé ezekuta direita husi ekipa (IGEADI,I.P).
Kona-ba asuntu tékniku, Diretór Diresaun Rejionál Infraestrutura, Remígio Nuno Sila, informa katak, tuir loloos planu ne’e ezekuta iha 2024 maibé ekipamentu balun sei halo hela reparasaun.
“Planu atu loke estrada ne’e dezde 2024 maibé ekipamentu limitadu, oras ne’e daudaun ekipamentu sira halo hela manutensaun ka reparasaun hela, karik iha fulan-Jullu ne’e nia laran manutensaun finaliza, ha’u hanoin husi departamentu IGEADI,I.P sei hatuun materiál sira hodi hala’o serbisu loke estrada foun komesa husi Lamasin to’o Lamasin,” nia dehan.
Antes ne’e Francisco Coi, nu’udar lia-na’in iha bairru Biele, rekomenda ba Autoridade RAEOA atu apoia konstrui infraestrutura bázika iha bairru Biele.
“Ami husu Governu sei bele loke estrada mai ami-nia knua Biele, tanba dezde tempu okupasaun to’o ohin loron ami laiha dalan atu asesu mai Lamasin no Bitila. Durante ne’e, ami-nia movimentu barakliu mak ba viziñu iha Naikake kecamatan Mutis, osan ami uza barakliu mak rupiah, tanba asesu mai ita-nia rain do’okliu, ne’ebé ami husu la’ós estrada de’it, maibé ahi, saúde mós seidauk iha, dezde uluk to’o agora ” nia hato’o rekomendasaun iha suku Bene-Ufe, foin lalais ne’e.
Notísia relevante:RAEOA hahú instala solár-sel ba uma-kain 216
Entretantu, bairru Biele nu’udar fatin izoladu liu iha Oekusi, lokaliza iha aldeia Lamasin suku Bene-Ufe sub-rejiaun Nítibe, durante ne’e laiha dalan atu asesu, situasaun ne’e komunidade Biele infrenta dezde tempu okupasaun to’o ohin loron.
Jornalista: Abílio Elo Nini
Editór: Rafael Ximenes de A. Belo
