DILI, 11 Jullu 2025 (TATOLI) – Proposta Lei Konkorrénsia presiza inklui artigu espesífiku ida hodi proteje setór produtivu nasionál, defende Partidu FRETILIN iha Parlamentu Nasionál.
Deputadu bankada opozisaun FRETILIN, Antoninho Doutel Sarmento, destaka katak lejislasaun ne’e importante hodi asegura no proteje operadór ekonómiku sira iha ezersísiu ba sira-nia atividade iha merkadu ida justu.
Nia sujere inkluzaun artigu espesífiku ida atu fó atensaun espesiál ba setór produtivu nasionál, liuliu iha área agrikultura, ekonomia informál, hanesan artezanatu, produsaun kafé, kooperativa, no atividade ekonómika iha eskala ki’ik.
Nune’e, tuir nia, kria espasu adekuadu ne’ebé asegura no evita katak la’ós empreza boot sira de’it mak benefisia, liuliu garante presu justu.
Tuir deputadu ne’e, merkadu atuál falta intervensaun efikás no idaidak halo tuir nia hakarak.
“Entaun, ita presiza lei ida ne’ebé garante funsionamentu negósiu ida ho presu sira ne’ebé justu no labele monopoliza”, akresenta.
Lei referida daudaun Komisaun D, ne’ebé trata Asuntu Ekonomia no Dezenvolvimentu, realiza audiénsia ho reprezentante ministériu no entidade relevante atu rona sira-nia opiniaun kona-ba proposta lei ne’e.
Notísia relevante: Lei Konkorrénsia garante kompetisaun saudavel iha negósiu
Jornalista: Nelson de Sousa
Editora: Maria Auxiliadora
