DILI, 16 Jullu 2025 (TATOLI) – Diresaun Nasionál Infraestrutura no Komunikasaun (DNIK), fasilita intranet ka konekta lokál ho kapasidade 40 gbps (gigabits per second) ba Rádiu Televizaun Timor-Leste, Empreza Públika (RTTL,E.P) halo transmisaun direita ba jogu Komunidade País Ko’alia Lian Portugés (CPLP, sigla portugés) ne’ebé sei hala’o entre 19-27 Jullu tinan ne’e.
Intranet maka rede komputadór privadu ida iha organizasaun ida nia laran ne’ebé permite funsionáriu sira atu komunika, kolabora no fahe informasaun ho seguru. Ida-ne’e esensialmente internet privadu ba empreza, la asesivel ba públiku. Intranet sira uza atu rasionaliza fluxu serbisu sira, hadi’a komunikasaun, no hadi’a envolvimentu funsionáriu nian liuhosi fornese plataforma sentralizada ida ba rekursu no informasaun empreza nian.
Diretór DNIK, Ambrisio Amarál, hateten serbisu ida-ne’e bazea ba pedidu husi Prezidente RTTL,E.P, Elizeu Isaac, oinsá maka atu apoia liña fibra ótika hodi asegura transmisaun direita durante jogu CPLP.
“Ligasaun ida-ne’e lokál ne’ebé DNIK dada fibra ótika ho nia kapasidade lokál iha kapitál Dili 40 gigabit ne’ebé konekta direta ba RTTL halo transmisaun direta ba jogu ne’e CPLP ho modalidade hotu ne’ebé sei hala’o iha Dili,”Ambrisio Amaral, ba Tatoli iha Kaikoli, kuarta ne’e.
Nia esplika, fatin ne’ebé DNIK dada ona fibra ótika apoia jogu CPLP mak hanesan Estádiu Munisipál Dili, Kampu Tenis Liseu, Coni, GMT, Fotebol Praia Lecidere no Sentru Konvensaun Dili (CCD) ne’ebé sai hanesan Sentru ba Mídia.
Nia subliña, fatin sira-ne’ebé RTTL sei halo transmisaun direita DNIK halo hotu ona teste ba kabu iha semana kotuk no ativu hotu ona maibé DNIK nafatin hamutuk ho RTTL hodi asegura tuir oráriu RTTL nian durante halo transmisaun direita.
“Ita prontu apoiu RTTL durante jogu ne’e la’o tanba fatin sira-ne’ebé sei realiza jogu ne’e ativa hotu ona, hein de’it,” nia konklui.
Jornalista: Arminda Fonseca
Editór: Evaristo Soares Martins
