VIKEKE, 17 Jullu 2025 (TATOLI)—Diretór Servisu Ministériu Agrikultura Peska, Pekuária no Floresta (SMAPPF), Olívio Soares Freitas informa SMAPPF apoia estensionista sira implementa sistema kuda hare liña Pratika Agrikultura Di’ak (PAD) ho ektare 250.
“Iha époka ida-ne’e ita implementa ona sistema PAD ba natar ektare 250. Kada ektare uza fini hare kilo ualu (8). Viveiru durante loron 12 ne’e fukit kuda ona. Ita kuda hare hun ida. Rendimentu iha tinan kotuk ita hetan kada ektare tonelada 7,6. Tanba ne’e, ha’u sente ita uza sistema PAD rezultadu di’akliu kompara ho sistema tradisionál kari no sistema konvensionál kuda,” Olívio Soares Freitas hateten ba TATOLI iha Postu Vikeke Vila, Kinta ne’e.
Olívio relata sistema PAD hamutuk ektare 250 ne’e kompostu husi ektare 103 iha Postu Vikeke Vila, ektare 25 iha Postu Uatulari, ektare 62 iha Uatukarbau no ektare 60 implementa iha Postu Ossú.
Nune’e, nia husu ba agrikultór sira husi Munisípiu Vikeke hakarak implementa sistema PAD bele koordena ho estensionista sira hodi hanorin sistema kuda hare tuir sistema PAD ne’ebé daudaun ne’e implementa ona iha natar ektare 250.
Koordenadór Estensionista Postu Uatulari, Francisco Timan Belo hateten progresu implementasaun sistema PAD iha Postu Uatulari la’o di’ak, ne’ebé implementa iha natar Beleku, Naedala no Uaitame.
“Iha implementasaun sistema PAD ne’e ami hanorin agrikultór sira kuda hare liña media 20×25. Ami haree hare agora di’ak, maibé ai-moruk pestesida mak laiha hodi rega ba peste sira-ne’ebé atake hare. Kona-ba ai-moruk ne’e parte SMAPPF Vikeke ohin mai haree ona natar sira-ne’ebé peste atake,” nia haktuir.
Iha Postu Uatulari, implementasaun PAD ne’e husi Asosiasaun Agrikultura Naedala ektare 10, Grupu Teakom Kuda Ulun ekatre 7 no Grupu Moris Foun Foho Manu Uaitame ektare 8.
Jornalista: Vitorino Lopez da Costa
Editór: Xisto Freitas da Piedade
