OEKUSI, 18 Jullu 2025 (TATOLI) – Eskola Katólika Nossa Senhora de Fátima Padiae, lokaliza iha suku Lalisuk sub-rejiaun Pante Makasar Rejiaun Administrativa Espesiál Oekusi Ambeno (RAEOA) hato’o sentimentu ksolok ba Governu Timor-Leste liuhusi servisu edukasaun Oekusi, tanba foin primeiravés eskola privada sira bele asesu ba programa merenda eskolár no fundu konseisaun eskolár nian.
Notísia relevante:Edukasaun Oekusi aloka rihun $410-resin ba programa merenda eskolár
Koordenadór Jerál Eskola Katólika Nossa Senhora de Fátima Padiae, Padre Rui Asamau, hato’o, nia orgullu iha ámbitu hetan vizita husi ekipa konjunta komposta husi Diresaun Rejionál Edukasaun, serbisu saúde no agrikultura, atu observa direita kondisaun koziña, hahán no maneira atendimentu ba alunu sira iha Padiae,ohin.
“Primeiru agradese ba Governu, liuliu servisu edukasaun Oekusi, ne’ebé ho hanoin di’ak ba estudante sira, tanba bele tulun mós eskola Katolika sira iha Oekusi, bele asesu ona ba programa merenda eskolár inklui fundu konseisaun eskolár nian, tan ne’e agradese tanba foin asesu iha tinan ne’e,” nia relata iha iha eskola Katólika Padiae, ohin.
Nia informa, eskola Katólika Padiae, akumula hahú kedas husi Eskola Bázika Filiál (EBF) no Eskola Bázika Sentrál (EBC, sigla portugés) ho totál estudante kuaze-400 no profesór 20-resin, ne’ebé maioria konsumu produtu lokál iha implementasaun merenda eskolár.
“Ami-nia koziñeiru sira, kompra ai-han barakliu mak produtu lokál, hanesan modo, sira ba hola de’it iha inan-aman sira-ne’ebé kuda hanesan kanko, lis, modo-mutin no seluk-tan, inklui fehuk, talas, husi, forremunggu, ida-ne’e nia intensaun atu sirkula osan Governu ne’e ba ema hotu, liuliu agrikultór sira-ne’e prodús, tanba ai-han sira-ne’e fó vítamina di’ak ba alunu sira,”
Notísia relevante:ME sei hapara EJP ba merenda eskolár iha territóriu nasionál
Iha fatin hanesan, Koordenadóra EBC Nossa Señora de Fátima Padiae, Cricencia Corbafo, agradese tanba tanba totál estudante iha terseiru siklu 94, komposta husi mane 53 no feto 42 ho profesór na’in-10, asesu direita ba merenda eskolár kada loron.
“Ami agradese ba Governu liuhusi Autoridade RAEAO serbisu edukasaun Oekusi, tanba programa merenda eskolár ne’e, la’o kle’ur ona, maibé ba eskola Katólika nu’udar privada, foin primeira-vés ami hetan apoia ne’e, ne’e duni ami agradese no sente kontente tanba estudante sira loron-loron bele han no hemu iha eskola,” nia orgullu.
Nia hateten, implementasaun programa merenda eskolár iha eskola EBC Katólika Padiae, iha menu hanesan oioin, iha loron segunda alunu sira han etu ho na’an-karau mistura ho tomate no bifi, ikan no modo-tahan, tersa-feira han talas, fehuk ho manutolu no forremunggu no susu-been to’o sexta-feira.
Iha sorin seluk, Koordenadora EBF, Nossa Señora de Fátima Padiae, Lorença Lalisuk, nia relata totál estudante hamutuk 332 komposta husi feto 181 no mane 151 ho totál profesór na’in-13.
“Tinan ne’e foin hahú implementa, ne’ebé husi eskola, ami kontenti tanba Governu tau matan mai ona mai ona eskola privada, ne’ebé ami jere iha eskola mak iha primeiru dia, segunda-feira hanesan ho EBC, labarik sira han etu ho na’an no modo inklui aifuan hanesan hudi, tersa to’o sesta-feira mós hanesan han produtu lokál mak barak hanesan talas, fehuk, ne’ebé produtu sira-ne’e maioria kompra iha ita-nia agrikultór iha suku ne’e rasik,” nia dehan.
Notísia relevante: https://tatoli.tl/2022/04/23/semana-oin-raeoa-re-ativa-programa-merenda-eskolar/
Lembra fali katak, antes ne’e Servisu Edukasaun Oekusi aloka rihun $410,496.66 husi Orsamentu Jerál Estadu (OJE) 2025 atu implementa progama merenda eskolár ho loron efetivu 53 ba Ensinu Pré-Eskolár (EPE) hamutuk 16, Ensinu Bázika Filiál (EBF)12 no Ensinu Bázika Sentrál (EBC, sigla portugés) hitu (7).
Programa ne’e alvu ba estudante 18.441 ba loron efetivu 53 ho totál orsamentu ne’ebé mak sai iha segundu períodu ne’e $410,496.66, kada estudante sei han $0,42 sentavus iha loron ida.
Jornalista: Abílio Elo Nini
Editór: Rafael Ximenes de A. Belo
