Semana oin, RAEOA re-ativa programa merenda eskolár
OÉ-CUSSE, 23 abríl 2022 (TATOLI)–Servisu Edukasaun no Juventude Desportu RAEOA, iha loron 22 fulan-abríl ne’e distribui orsamentu hodi re-ativa programa merenda eskolár ba estudante pré-eskolár no ensinu báziku hamutuk eskola 82.
“Programa merenda eskolár ba tinan ne’e, foin mak hahú bazea ba prosesu orsamentu ne’ebé ita halo ona, agora dadauk ita halo ona pagamentu ba eskola públiku sira,” Diretór Edukasaun RAEOA, Daniel Maunu hateten sabádu ohin, iha RAEOA.
Notísia Relevante :Programa merenda eskolár iha Baucau hahú maiu
Nia esplika alokasaun orsamentu faze dahuluk nian ba eskola sira sei uza hodi tein hahan ba estudante hamutuk 18.097 husi eskola 82 durante fulan ida.
“Orsamentu ne’e faze primeiru, durasaun durante loron 30 ba fulan ida nian, depois maka ita prosesa tan ba faze tuir mai, tanba iha tinan ne’e ita foin mak realiza,” nia informa.
Kona-ba orsamentu, nia parte simu tranferénsia husi Ministériu Edukasaun Juventude no Desportu (MEJD) liuhosi konta bankaria RAEOA-ZEESM ho valór $111,697.00, hodi finansia programa merenda eskolár iha Oé-Cusse durante loron 30.
Tuir planu programa merenda eskolár iha RAEOA sei hahú iha fulan-maiu 2022 ho menu aihan husi produtu lokál.
“Tan ne’e maka maneira ne’e hosi forñesedór sira, oinsá uza produtu lokál iha Oé-Cusse, hanesan fehuk, aifarina, hudi ho xa, tanba kaléndariu implementasaun ne’e tenki semana oin ou bele mós iha inisiu fulan-maio,” nia hateten.
Entretantu, programa eskolár paradu durante ne’e tanba impaktu husi pandemia globál COVID-19.
Notísia Relevante :Tinan ne’e, Governu prevee kuaze millaun $8 ba programa merenda eskolár
Jornalista: Abílio Elo Nini
Editór : Agapito dos Santos
