DILI, 18 Jullu 2025 (TATOLI)—Profisionál saúde husi Portugál hamutuk na’in-sia (9) sei apoiu ekipa nasionál husi Ministériu Saúde atu fó atendementu ba atleta sira iha jogu desportivu CPLP ne’ebé sei realiza hahú husi 19 Jullu 2025 to’o 27 Jullu 2026 iha Timor-Leste.
Notísia Relevante: TL-Portugál prontu kompete iha abertura jogu desportivu CPLP
“Agora temporariamente médiku husi Portugál hamutuk na’in-tolu (3), enfermeira na’in-neen (6) mai husi Institutu Nasionál Emerjénsia Medika (INEM) no Emerjénsia Medikál Team (EMT) ne’ebé mak ami koordena hamutuk dezde horisehik halo ona enkontru ida, oinsá ami atu fó atendementu ba atleta sira,” Diretór Servisu Nasionál Ambulánsia no Emerjénsia Médika (SNAEM), Simplicio Amaral, hateten ba Agência Tatoli iha estádiu Munisipál Dili, ohin.
Nia esplika, ohin dadeer médiku sira husi Portugál hala’o ona vizita ba iha Hospitál Nasionál Guido Valadares no sira apresia tebes ho Timor-Leste nia preparasaun sira ba jogu CPLP ne’e rasik.
“Kada membru nasaun CPLP sira, lori sira-nia ekipa médiku. Tanba, husi Portugál ita hatene ona sira-nia kuantidade médiku. Agora, husi nasaun seluk hanesan Angola, Mosambike São Tome e Principé, Kabo Verde, ita seidauk hatene. Bainhira sira to’o iha Timor, ita-nia ekipa médiku sei simu sira iha aeroportu, ho nune’e ita bele identifika katak sira iha médiku hira, enfermajen hira,” nia haktuir.
Nia relata, ekipa nasionál husi Ministériu Saúde totál profisionál saúde hamutuk 120 inklui ho ekipa lojistika no apoiu husi Sentru Nasionál reabilitasaun Becora, apoiu tan husi parseiru sira hamutuk 150.
“Agora ambulánsia ne’ebé mak atu destaka ba iha estádiu iha 19 Jllu ne’e mak hamutuk lima, husi ne’e iha mós ambulánsia VIP. Totál médiku espesialista timoroan ne’ebé iha mak hanesan espesialista emerjénsia, médiku desportivu no médiku ortopedia inklui ho espesialista sira seluk tan,” nia afirma.
Nia dehan, voluntariu ne’ebé atu apoiu ba iha jogu CPLP ne’e mak hanesan CVTL, Bombeiru husi seksaun saúde, departamentu seksaun saúde husi PNTL atu sai ekipa ida hodi atende ba jogu ida-ne’e.
Husi jogu abertura ne’ebé monu iha loron 19 Jullu ne’e médiku hotu-hotu sei konsentra iha estádiu munisipál Dili, depois ida-ne’e ramata mak médiku sira ba fali postu médiku ne’ebé mak harii ona iha kada modalidade sira.
Jornalista : Felicidade Ximenes
Editór : Cancio Ximenes
