DILI, 19 Jullu 2025 (TATOLI)—Primeiru-Ministru Interinu no atuál Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, konsidera jogu desportivu CPLP la’ós kompetisaun maibé kompromisu amizade.
Notísia Relevante: TL-Portugál prontu kompete iha abertura jogu desportivu CPLP
Nia hatutan, jogu CPLP hanesan momentu selebrasaun la’ós de’it ba nasaun Timor-Leste maibé ba nasaun membru CPLP hotu katak Unidade mak ita ida de’it.
“Tema CPLP “Unidos Somos um “ nu’udar tema ne’ebé refleta ba komunidade no reafirma katak unidade nasaun nian mak valór gratidaun,” Primeiru Ministru Interinu ne’e hatete liuhusi ninia diskursu bainhira halo abertura ba jogu desportivu Comunidade dos Países da Língua Portuguêsa (CPLP), iha estádiu munisipál, Dili, ohin.
Ministru ne’e hateten, jogu CPLP la’ós kompetisaun maibé oportunidade atu espresa Timor-Leste nia kompromisu ba amizade, solidariedade no kooperasaun entre membru nasaun CPLP, maibé bele mós empodera juventude atu kompete ho dixipliña, koordenasaun entre espíritu ekipa no realiza juventude nia mehi.
“Ida-ne’e oportunidade di’ak hodi aprende no oinsá atu diverte liuhusi interkámbiu sira hodi mellora di’ak liután espíritu desportiva nian,” nia hateten.
Aleinde ne’e, ventu ne’e mós fó oportunidade ba ita atu halo diálogu polítika no kolaborasaun hodi reforsa juventude, institusionál ho vizaun desportivu ne’ebé ida ba to’o komunidade.
“Agradese ba membru CPLP sira hotu ne’ebé mak marka ona prezensa ba iha jogu desportiva ne’ebé organiza husi Timor-Leste. Ami mós respeita ba razaun husi nasaun seluk ne’ebé la partisipa, espera iha futuru mai bele partisipa fali,” dehan dehan.
Jornalista : Alexandra da Costa
Editór : Cancio Ximenes
