BOBONARU, 21 Jullu 2025 (TATOLI)—Autoridade Munisípiu Bobonaru ameasa hapara kontratu Ofisiál Apoiu Suku ne’ebé durante ne’e la ativu servisu ka abandona sede suku.
Pozisaun ne’e hato’o husi Sekretáriu Autoridade Munisípiu Bobonaru ba asuntu Sosiál no Organizasaun, Júlio Carvalho Caeiro tanba simu informasaun husi komunidade no xefe suku balun katak Ofisiál Apoia Suku balun liuliu sira-ne’ebé iha área rurál durante ne’e la ativu servisu ka abandona sede suku.
Caeiro fundamenta katak iha tempu badak Autoridade Munisípiu Bobonaru sei forma ekipa ida hodi halo vizita surpreza ba sede suku 50 atu halo kontrolu no haree direta funsionamentu servisu Ofisiál Apoia Suku nian.
Nia subliña liuhusi monitorizasaun ne’e karik ekipa sira identika duni Ofisiál Apoia Suku la halo servisu, Autoridade Munisípiu Bobonaru sei foti sansaun rigorozu tanba IX Governu halo rekrutamentu ba funsionariu hirak-ne’e atu reforsa administrasaun iha suku hodi halo atendimentu ba komunidade.
“Karik liuhusi monitorizasaun ne’e identifika sira la ativu, ne’e ami sei tama iha prosesu avaliasaun dezempeñu no kontratu sei para tuir tempu ne’ebé determinadu ona,” nia informa ba jornalista sira iha eskola Koléjiu Maliana, Segunda ne’e.
Iha sorin seluk, Komunidade Postu Administrativu Bobonaru, João de Jesus Leto Mau deklara hanesan komunidade ida-ne’ebé maihusi suku nia parte apoia no konkorda ho planu autoridade Munisípiu Bobonaru tanba konsidera atu funsionáriu ne’e kontra lei no fó prezuiju ba Estadu.
“Sira-ne’e servidór Estadu. Governu rekruta sira halo atendimentu komunidade atu trata dukumentu ruma, más realidade ha’u haree dadeer tuku 10:00 ona mós sede suku ema laiha,” nia haktuir.
Totál funsionariu Ofisiál Apoiu Suku iha Munisípiu Bobonaru hamutuk na’in-200.
Jornalista: Sergio da Cruz
Editór: Xisto Freitas da Piedade
