DILI, 21 Jullu 2025 (TATOLI)—Atleta husi nasaun Portugál nain-hitu ne’ebé kompete iha Modalidade Atletizmu rekolla medalla ouru lima (5) no prata rua (2), ne’ebe kompostu husi primeiru lugár to’o segundu lugár iha jogu Desportiva Komunidade País Ko’alia Lian Portugés (CPLP-sigla portugeza).
Atleta hirak-ne’e mak hanesan Samuel Butarita Rodrigues kompete iha korrida metru 1500, Laura Branco Jorge da Silva kompete iha korrida metru 100, Maria Clara Monteiru kompete iha korrida metru 3000, Margarida Braz Simões kompete iha lansamentu pezu, Leonor Silva de Freitas korrida metru 100, Miguel Martinhos de Almeida kompete iha korrida metru 100, Tiago André Barros dos Santos ne’ebe kompete iha korrida metru 100.
Tanba ne’e, Alcino Pereira, tékniku Federasaun Atletizmu Portugál sente satisfáz tebes ho susesu ne’ebé nia atleta sira atinje iha klase hitu modalidade atletizmu nian tanba atleta barak liu mak prova iha primeiru lugár inklui mós iha segundu lugár.
“Ida-ne’e hanesan sorti di’ak ida ba Portugál iha kompetisaun ohin loron,” pesoál tékniku ne’e informa ba TATOLI iha Estádiu Munisipál Dili, Segunda ne’e.
Aleinde ne’e, sira mós lahaluha hato’o agradese ua’in ba apoiu husi públiku tomak ne’ebé durante ne’e fó suporta ba sira-nia atleta.
“Ha’u hein katak aban atleta Portugál bele konkorre tan medalla maski ita lahatene loron aban ne’e lahanesan ho ohin,” nia informa.
Jornalista : Alexandra da Costa
Editór : Cancio Ximenes
