DILI, 23 Jullu 2025 (TATOLI)—Desportu Taekwondo iha Timor-Leste hahú hatudu mudansa hafoin oferese medalla haat iha Jogu Desportivu Komunidade Nasaun Lian Portugés (CPLP-sigla portugeza).
Fundadór no Treinadór Dojang Tiger IPDC (Institutu Profisionál Canossa), Francisco Gama da Costa Lobo relata louva ho prestasaun ne’ebé atleta na’in-haat hatudu iha kompetisaun modalidade Taekwondo no rezultadu referidu konsideradu Modalidade Taekwondo iha Timor-Leste hahú hatudu mudansa signifikativu.
“Sente orgullu tanba medalla osan-mean dahuluk ba Taekwondo iha jogu CPLP no Taekwondo mak modalidade ne’ebé hatudu iha prestasaun,” Francisco Lobo informa ba TATOLI iha Jináziu Dili, Kuarta ne’e.
Observadór Taekwondo ne’e haktuir istorikamente partisipasaun Taekwondo iha Jogu Desportivu CPLP durante ne’e sempre derrota no laiha medalla osan-mean, más tinan ne’e konsege rekolla medalla osan-mean.
Notísia relevante: Atleta Taekwondo Siera Pinto gaña medalla osan-mean iha Jogu CPLP
Lobo rekomenda katak iha futuru atleta sira presiza aumenta oras jogu liuhosi partisipasaun iha kompetisaun nasionál no internasionál, kontinua mantein disiplina, aumenta fasilidade ne’ebé avansadu no kontrola alimentasaun nune’e bele hasa’e liután prestasaun Taekwondo iha nivel internasionál.
“Atleta sira bá-oin tenke disiplina no mantein pezu nune’e labele iha impaktu ba fiziku,” Lobo akresenta.
Entretantu, atleta ho modalidade Taekwondo iha Jogu Desportivu CPLP oferese medalla haat ba Timor-Leste kompostu husi Deofia Barreto (osan-mean ida), Siera Pinto (Osan-mean ida), Nélio dos Santos (Osan-mutin ida) no Denilton Pereira (osan-metan ida).
Jornalista: Natalino Belo
Editór: Xisto Freitas da Piedade
