DILI, 24 Jullu 2025 (TATOLI)—Emiradu Árabe Unidu (EAU) no Governu Timor-Leste sei asina nota entendimentu kona-ba konstrusaun dormitóriu ba estudante feto sira iha Aitarak-Laran, Dili. Asinatura akordu ne’e sei hala’o iha fulan oin.
Vise-Primeiru-Ministru Asuntu Ekonómiku, Francisco Kalbuadi Lay, hamutuk ho Embaixadór EAU ba Repúblika Indonézia, Embaixadór Naun-Rezidente bála Repúblika Demokrátika Timor-Leste no ba ASEAN, Abdulla Salem AlDhaheri, aprezenta ona ba Primeiru-Ministru (PM), Xanana Gusmão, iha enkontru ne’ebé realiza iha Palásiu Governu, ohin.
“Ami diskute asuntu lubuk ida, maibé espesifikamente ko’alia liu kona-ba oinsá atu dezenvolve hamutuk projetu konstrusaun dormitóriu ba estudante femeninu ne’ebé antes ne’e tuir loloos atu konstrui iha Komunidade Madre Canossiana Balide. Ami simu solititasaun atu muda fatin konstrusaun ne’e tanba iha Komunidade Canossiana Balide fatin mak loot, labele akumula domirtóriu ne’e. Tanba ne’e, ami halo hela redezeñu”, Abdulla Salem AlDhaheri dehan.
Nia esplika objetivu atu harii dorimitóriu ne’e hodi akumula estudante feto sira ne’ebé mai husi munisípiu sira no hala’o estudu iha Dili, maibé laiha kapasidade ekonómika atu aluga uma, nune’e hela dormitóriu ne’e no sei selu maibé ho folin ne’ebé ki’ik.
Fatin ne’ebé sei harii dorimitóriu ne’e iha Palásiu Prezidente nia kotuk, ne’ebé daudaun ekipa SEATOU halo hela serbisu atu hamamuk fatin.
“Durante enkontru, ami diskute mós kona-ba izensaun vistu entre nasaun rua nian. Ami orgullu tanba bele serbisu hamutuk ho Timor-Leste no iha interese tebes atu mai halo investimentu, nune’e bele loke kampu traballu ba timoroan sira inklui hametin liután kooperasaun entre nasaun rua nian”, konklui
Jornalista: Arminda Fonseca
Editora: Maria Auxiliadora
