VIKEKE, 25 Jullu 2025 (TATOLI)—Diretór Servisu Rejistu no Notariadu Munisípiu Vikeke, Rogério da Costa informa katak hahú fulan-Janeiru to’o fulan Jullu 2025 Notariadu Munisípiu Vikeke rekolla taxa husi pasaporte hamutuk $2.280,00 bá kofre Estadu.
“Taxa sira-ne’e ami rekolla liuhusi ita-nia komunidade ne’ebé trata sira-nia dokumentu pasaporte hamutuk 449. Husi númeru pasaporte ne’e, ita rekolla taxa $2.280,00. Kona-ba taxa sira-ne’e ita-nia rekerente sira bá selu rasik iha banku,” Rogério da Costa ba TATOLI iha ninia kna’ar fatin, Sesta ne’e.
Diretór Notariadu Munisípiu Vikeke ne’e hatutan atendimentu ba rekerente sira-ne’ebé trata dokumentu pasaporte iha notariadu kada semana atende dala ida, bazeia ba orientasaun husi Diresaun Jerál Notariadu Nasionál.
“Atendimentu pasaporte kada semana ami atende másimu ne’e na’in-20 no atende mínimu na’in-15 tanba ita-nia makína imprime ida de’it. Tan ne’e mak ita halo atendimentu ba pasaporte limita rekerente sira,” nia relata
Kona-ba dezafiu, nia dehan, kamera hasai fotografia ba atendimentu pasaporte nian ida de’it mak daudaun ne’e iha notariadu.
“Iha-ne’e kamera ida de’it, ne’ebé tempu halo BI ami tenke muda kamera husi atendimentu pasaporte nian. Nune’e mós ba oráriu pasaporte nian ami tenke muda kamera husi atendimentu BI. Ami hakarak ne’e aumenta kamera ida tan nune’e fasilita servisu lalais. Prekupasaun sira-ne’e ami sempre hato’o beibeik bá nasionál maibé seidauk fó resposta,” nia hato’o.
Tuir dadus, funsionáriu ne’ebé daudaun servisu iha Notariadu Munisípiu Vikeke hamutuk na’in-15 hodi atende komunidade.
Jornalista: Vitorino Lopez da Costa
Editór: Xisto Freitas da Piedade
