DILI, 30 Jullu 2025 (TATOLI)—Vise-Ministru ba Fortalesimentu Institusionál Saúde, Jose Magno dos Reis, informa Ministériu Saúde hamutuk ho Menzies sei halo lansamentu ba programa Wolbachia ne’ebé antes ne’e planeia atu lansa iha iha 20 Agsotu ne’e agora adi’a ba iha 08 Agostu 2025 iha Jardin Largo de Lecidere, Dili.
Notísia Relevante: MS-Menzies lansa programa Wolbachia iha 20 Agostu
“Ita-nia lansamentu ba programa Wolbachia ne’e sei hala’o iha loron 8 fulan-Agostu iha Largo Lecidere, nune’e ita sei konvida ita-nia autoridade másimu sira iha Dili atu partisipa hotu,” Jose Magno dos Reis informa ba jornalista sira iha Kaikoli, ohin.
Nia afirma, programa Wolbachia hanesan estratéjia di’ak ida atu redús insidénsia moras dengue iha komunidade nia leet, tanba ida-ne’e hetan apoiu husi World Mosquito Program no mós Menzies Austrália.
“Susuk tolun ne’ebé mak ita sei halo lansamentu ne’e, numeru ezatu ha’u la lembra, maibé iha ne’eba ita sei husik susuk tolun millaun ba millaun ne’ebé ita sei husik iha área Dili. Depois, ita haree iha ona mudansa ruma mak ita kontinua ba munisípiu sira seluk,” nia dehan.
Nia husu ba populasaun sira iha Dili keta tauk kona-ba progarama Wolbachia ida-ne’e, tanba la fó impaktu negativu ba ema no mós ba enferiamentu sira seluk, tanba antes ne’e Minsitériu Saúde halo ona sensibilizasaun.
“Ita halo ona sensibilizasaun ba komunidade iha munisípiu Dili kuaze 99%. Komunidade kontente no aseita simu Wolbachia ida-ne’e, nune’e bele halakon dengue iha Timor-Leste,” nia dehan.
Entretantu, iha loron 8 Agostu 2025, MS no Menzies sei halo lansamentu ba programa Wolbachia no sei husik susuk ba iha komunidade nia leet iha munisípiu Dili, iha loron 11 fulan-Agostu 2025.
Jornalista : Felicidade Ximenes
Editór : Cancio Ximenes
