DILI, 31 Jullu 2025 (TATOLI)–Membru Parlamentu Foinsa’e Timor-Leste (PFN), Kinta ne’e, realiza plenária ba períodu dalimak (2024-2026) hodi diskute asuntu lima hanesan edukasaun, saúde, empregu, partisipasaun sívika no violénsia ka krime.
“Temátiku primeiru diskute kona-ba asuntu edukasaun ne’ebé liga ba joven sira, asuntu saúde ba joven sira, empregu no empregabilidade ba joven sira, partisipasaun sívika joven sira-nian inklui mós violénsia ka krime,” Prezidente Alumni Foinsa’e Timor-Leste, Zaulino Gomes da Silva dehan iha salaun MSSI, Kaikoli, Dili.
Prezidente Alumni Foinsa’e Timor-Leste konsidera katak Governu iha kompromisu oinsá atu halo investimentu ba joven sira.
‘Ida-ne’e hatudu ba joven sira atu prepara ba kuadru Estadu no prepra futuru líder sira. Hanesan ita hatene, reflete ba ita-nia istória rai ida-ne’e nian, ita-nia líder sira agora hahú mehi rai ida-ne’e nia futuru hahú ho idade joven, tanba ne’e presiza esforsu no prepara ba futuru,” Zaulino haktuir.
Nia esplika katak plenária Parlamentu Foinsa’e hanesan espasu ba membru Parlamentu Foinsa’e sira atu diskute kona-ba asuntu sira-ne’ebé nakait ba joven sira-nia situasaun, liuliu liga bá área edukasaun, saúde, empregu no partisipasaun sívika.
Nia tenik membru Parlamentu Foinsa’e períodu 2024-2026 hamutuk 142, tanba ne’e hakarak ka lakohi Governu tenke halo investimentu ba joven iha kualker espasu, atubele haree katak joven sira iha duni kompeténsia atu kontinua prosesu sira-ne’e.
Zaulino adianta depoizde plenária, dokumentu ba asuntu ne’e sira sei enkamiña ba Ministériu Juventude, Desportu, Arte no Kultura (MJDAK) atu kontinua lori bá Konsellu Ministru no ministériu sira-ne’ebé relevante hodibele responde ba evidénsia ne’ebé membru Parlamentu Foinsa’e sira foti.
Iha fatin hanesan, Ministu Juventude, Desportu, Arte no kultura, Nelyo Isaac Sarmento hateten joven hanesan futura nasaun tenke buka aprende no prepara aan.
“Se dehan futura nasaun iha imi-nia liman, maibé la prepra aan, la enxe imi-nia aan ho koñesimentu atu reforsa imi-nia kapasidade, ne’e nasaun sei laiha imi-nia liman. Maibé, ho meiu sira-ne’ebé ohin-loron imi iha, ne’e parte atu enxe no prepara imi-nia aan hodi simu kna’ar hotu-hotu,” governante ne’e enkoraja.
Nelyo solisita joven sira atu labele sente moe no labele sente katak lahatene buat ida, maibé fiar ba katak buat ne’ebé aprendidu bele kontribui ba nasaun.
“Tanba ita-boot sira aprende husi Polítika Nasionál Juventude nian, ne’ebé ofisialmente ba períodu dalimak. Espera katak imi-nia diskusaun ne’e nia rezultadu sai ho di’ak no husik hela buat di’ak ruma ba sira foun ne’ebé sei mai,” nia subliña.
Eis jornalista ne’e husu ba membru sira tenke orgullu ho oprtunidade ne’ebé hetan tanba dalaruma joven sira seluk la haten oportunidade hanesan ne’e.
Jornalista : Osória Marques
Editora : Julia Chatarina
