DILI, 05 Agostu (TATOLI)—Organizasaun Mundiál ba Saúde (OMS) liuhusi ninia reprezentante iha Timor-Leste hatete susuben inan nian hanesan investimentu ba futuru ne’ebé saudável.
“Ita investe fó-susubeen inan nian, ita sei investe iha futuru ida ne’ebé saudavel, matenek, no forte liu ba ema hotu”, Reprezentante Organizasaun Mundiál ba Saúde (OMS), Arvind Mathur, dehan liuhusi komunikadu ne’ebé TATOLI asesu, ohin.
Ámbitu komemorasaun semana mundiál susuben inan nian neébé hahú iha loron 1 Agostu to’o loron 8 Agostu, ho tema tinan-ne’e mak investe iha fó-susubeen inan nian, investe iha futuru, maka xamada ba asaun.
Nia mos dehan susubeen inan ne’e gratuita, maibé nia bele salva moris, hasa’e forsa ba kakutak, hamenus kustu ba kuidadu saúde nian.
“Susubeen inan nian fó enerjia no nutriente ba labarik, sira presiza husi fulan-neen to’o 24. Bainhira labarik moras, bele sai ai-han úniku ne’ebé konsumu hanesan ai-moruk ba bebé sira”, nia dehan.
Representante ne’e afirma labarik sira ne’ebé hetan susubeen inan nian iha posibilidade ki’ik liu atu hetan obesidade, iha tendénsia atu aprende di’ak liu iha eskola, no bele hetan atinjimentu barak liu bainhira sai adultu.
Nia mos informa kauza ba labarik sira ne’ebé konsumu susuben fórmula ne’e tanba barak hasoru dezafiu boot sira hanesan, lisensa maternidade ne’ebé badak, laiha espasu atu fó susubeen inan iha serbisu fatin, konsellu ka apoiu uitoan de’it, no publisidade ne’ebé agresivu ba susubeen fórmula.
“Iha Timor-Leste, ita-simu no valoriza fó-susubeen-inan. Maibé ita presiza harii husi ida-ne’e hodi kria sistema ne’ebé forte liu, ne’ebé ajuda inan sira atu fó susubeen-inan nafatin, liuliu bainhira halo balansu entre serbisu, uma, no kuidadu ba labarik sira”, akresenta tan.
Selebrasaun semana mundial fó susuben inan, OMS, UNICEF no parseiru sira hotu promete sei servisu makaas atu apoiu inan sira no bebé sira ne’ebé foin moris. (ki)
