BOBONARU, 18 Agostu 2025 (TATOLI)—Iha Domingu (17/08), ahi-han rezidensía Xefe Aldeia Moleana, Suku Ritabou, Postu Administrativu Maliana, Munisípiu Bobonaru, Aquito Leto. Inséndiu ne’e rezulta ahi han-mutuk uma ne’e no agora hela de’it ahuk-desan.
Sasin Aguido Maria haktuir katak inséndiu ne’e akontese derepente iha tuku 13:00 Otl.
“Akontesimentu ne’e ha’u ho alin ida to’o uluk hodi haree. Bainhira to’o iha-ne’e ita lahatene ahi ne’e husi ne’ebé. Iha tempu ne’e ami na’in-rua labele halo buat ida tanba ahi han boot ona no ami na’in-rua fó hatene maluk viziñu sira, ami mai hamutuk iha-ne’e mós labele halo buat ida. Maluk balu konsege kontaktu ba Bombeiru maibé la konsege to’o tuir tempu ne’ebé atu salva uma, tanba ita hatene ohin loron Domingu sira presiza deskansa,” nia informa ba jornalista sira iha fatin akontesimentu.
Entretantu, vítima Aquito Letto nu’udár Xefe Aldeia Moleana informa inséndiu ne’e akontese bainhira sira laiha fatin.
“Ami halo hela atividade agrikultura iha natar ne’ebá. Ahi ne’e mosu família sira liga ba dehan de’it ahi han uma. Ninia kronolojia loloos ne’e ami lahatene. Ha’u mós husi dook mai to’o iha-ne’e uma laiha ona, hela de’it mak ai-riin, ninia kalen-didin sira-ne’e monu hotu ona ba rai,” Aquito haktuir ho matabeen.
Nia sente triste tanba sasán ida mós la konsege salvadu,hela de’it roupa iha isin-lolon.
“Ha’u laiha buat barak. Sasán hirak-ne’ebé ahi han mak hanesan jeleira ida, laptop ida, ami-nia roupa, ami na’in-rua ferik-oan nia dukumentu importante ho oan sira-nian, bikan, sanan, asesoria uma-laran, osan $50. Ami na’in-haat sai ho roupa isi-lolon de’it,” Aquito hateten.
Entretantu, Xefe Departamentu Jestaun Risku Dezastre, Cristiano Lonardo Lengo informa Autoridade Protesaun Sivíl sei fó apoia emerjénsia ba vítima kompostu husi ai-han no la’ós ai-han no sei hetan mós apoia rekuperasaun tanba konsidera estragu totál.
“Ami sei foto dadus hodi enkamiña ba nasionál para bele hein prosesu tuirmai,” nia dehan.
Husi akontesimentu ne’e, ekipa Korpu Bombeiru konsege to’o fatin akontesimentu, maibé la konsege salva uma no sasán tanba simu informasaun tarde.
Jornalista: Sergio da Cruz
Editór: Xisto Freitas da Piedade
