DILI, 20 Agostu 2025 (TATOLI)—Vise Primeiru-Ministru (PM), Ministru Koordenadór Asuntu Sosiál, no Ministru Dezenvolvimentu Rurál no Abitasaun Komunitária, Mariano ‘Assanami’ Sabino, husu joven sira kontinua luta tuir prinsípiu Forsa Armada Libertasaun Nasionál Timor-Leste (FALINTIL) nian iha prosesu dezenvolvimentu nasaun.
Líder Juveníl hato’o asuntu ne’e, iha ámbitu komemorasaun tinan 50 ezisténsia Forsa Armada Libertasaun Nasionál Timor-Leste (FALINTIL), hahú 20 Agostu 1975 to’o 20 Agostu 2025.
“Sira ne’ebé moris mantein nafatin ho espíritu no dedikasaun valór no prinsípiu hotu ne’ebé FALINTIL rai hela ba ita. Hanesan jerasaun foun, ita mantein tenke kontinua luta nafatin, tanba luta ba libertasaun nasionál no libertasaun pátria ita hakat liu ona, maibé libertasaun povu ita mantein atu kontinua. Tanba ne’e, ezisténsia tinan 50 ne’e, selebra mós ba jerasaun foun sira atu komunga prinsípiu ne’e, atubele fó kontinuidade ba luta FALINTIL nian,” Assanami hato’o iha salaun Ministériu Negósiu Estranjeiru no Kooperasaun (MNEK), Praia dos Coqueiros, Kuarta ne’e.
Notísia relevante : Lere husu joven sira estuda hodi hatutan mehi FALINTIL
Governante ne’e konsidera, loron ne’e importante tebes atu fó parabéns ba povu tomak tanba FALINTIL rezulta husi povu maubere no buibere ne’ebé hahoris ho transformasaun ba maubere oan sira inklui Militár profisionál sira ne’ebé mai husi tempu okupasaun.
Nia dehan, tinan 50 ezisténsia FALINTIL ida-ne’e atu kontinua no nafatin sai espíritu ba FALINTIL-Forsa Defeza Timor-Leste (F-FDTL) tanba konsege transforma hanesan klamar F-FDTL, nune’e hotu-hotu ho korajen, glória no onra ba sira hotu ne’ebé sakrifíka-an ba FALINTIL nia luta ba rai ne’e.
Nia hatutan, Governu orienta ona Ministériu Asuntu kombatante Liberasaun Nasionál (MAKLN) atu kontinua tau-matan ba forsa sobrevivente sira ne’ebé filafali ona ba vida sivíl, tanba maski sira iha ona vida sivíl maibé sira iha espíritu kontinua luta no sai lisaun ba foin-sa’e sira.
“Momentu ne’ebé difísil, sira mak hamriik iha oin no momentu ita hetan liberdade sira moris hanesan povu baibain, ida-ne’e lisaun ida ne’ebé importante ba ita katak dedikasaun la ramata no kontinua. FALINTIL hanesan ezemplár ba ita jerasaun foun sira,” nia subliña.
Jornalista : Arminda Fonseca
Editora : Julia Chatarina
