DILI, 20 Agostu 2025 (TATOLI)-Eis Xefe Estadu Maiór Jenerál Forsa Armada (XEMGFA), Tenente Jenerál Lere Anan Timur, husu ba joven sira atu estuda no kria pás hodi hatután FALINTIL sira nia mehi, ne’ebé konsege liberta Nasaun husi okupasaun.
“Ohin ita komemora ezisténsia FALINTIL ba dala-50. Ami aprende halo funu iha tinan-24 nia laran. Agora joven sira, saida mak sira atu halo fali mak estuda no kria pás para hatután fali mehi FALINTIL nian uluk, katak funu ba vizaun ida mak liberta pátria no liberta povu, agora joven sira estuda, estuda para aban bain-rua dezenvolve ita-nia rai sai di’ak liu tán”, Lere hatete ba TATOLI hafoin partisipa semináriu internasionál ho tema “A Reforma do Setor Defesa e Seguransa O Ensino Superior Militar, A Lideransa e A Defesa Dos Recursos Nacional” ne’ebé organiza husi Ministériu Defeza iha salaun Nobre MNEK, kuarta-ne’e.
Nia fó omenajen ba erói no eroina FALINTIL no ba hirak ne’ebé fó sira nia-án ba mate no liberta ona Timor-Leste sai nasaun independente.
“Ha’u fó ha’u nia omenajen ba erói no eroina sira, biar ami uituan mak fila mai vila laran, maibé ba sira ne’ebé ohin laiha iha ne’e, sira ne’e mak erói tanba brani fó sira nia vida ba povu no nasaun ida ne’e ohin ita konkista objetivu.l, ita tenke fó onra ba sira”, nia konklui.
Notísia relevante: Lere enkoraja estudante no joven atu hatene istória Timor
Jornalista : Natalino Costa
Editora : Rita Almeida
