DILI, 21 Agostu 2025 (TATOLI)—Federasaun Futeból Timor-Leste (FFTL) sei kontinua kompetisaun Kopa Juvenil iha faze rejionál hafoin finaliza iha nivel munisipál.
Diretór Kompetisaun Eventu Federasaun Futeból Timor-Leste (FFTL), João Campos esplika kompetisaun referida to’o iha finál iha kada munisipál ne’ebé partisipa husi klube sira no tuir planu sei kontinua ba kompetisaun rejionál ne’ebé reprezenta husi kada munisípiu iha fulan-Setembru tinan ne’e.
“Bainhira rejionál ramata sei kontinua iha nivel nasionál ne’ebé tuir planu sei realiza iha fulan-Setembru maibé sei hein resposta husi Ministériu Juventude, Desportu, Arte no Kultura (MJDAK) ligadu ho Estádiu Munisipál Dili,” João Campos informa ba TATOLI iha ninia kna’ar fatin, Bairros dos Grilos, Kinta ne’e.
Notísia relevante: FFTL realiza kompetisaun Kopa Juvenil iha Baukau
Kompetisaun referida sei fahé ba nivel rejionál hamutuk haat hanesan rejionál leste ne’ebé Munisípiu Baukau mak sai uma-na’in no sei kompete husi Munisípiu Lautein, Manatutu, Vikeke no Baukau.
Rejionál sentrál sei reprezenta Munisípiu Aileu, Ainaru, Kovalima no Manufahi no Manufahi mak sai uma-na’in. Parte oeste kompostu husi Munisípiu Ermera, Likisá, Oekusi inklui Ermera nu’udár uma-na’in.
Enkuantu, rejionál Munisípiu Dili kompostu husi Dili Leste, Dili Oeste no Bobonaru nu’udár uma-na’in mezmu posibilidade sei esklui Asosiasaun Dili Oeste ne’ebé to’o agora seidauk realiza Kopa Juvenil iha Munisípiu Dili.
“Bainhira la realiza jogu iha munisipál, labele tuir kompetisaun iha rejionál tanba bazeia ba regulamentu no kompromisu ne’ebé entre FFTL ho Asosiasaun Munisipál sira hala’o ona,” João Campos informa.
Kompetisaun nivel munisipál ne’ebé realiza iha kada munisípiu envolve Asosiasaun 13, nune’e bainhira ramata munisípiu ne’ebé manán sei kontinua kompete iha nasionál.
Entretantu, FFTL rasik realiza kompetisaun Kopa Juvenil ba tinan-2025 ho objetivu atu halo identifikasaun ba jogadór potensiál husi kada munisípiu hanesan jogadór feminina no mane nune’e reforsa ekipa selesaun nasionál Timor-Leste.
Jornalista: Natalino Belo
Editór: Xisto Freitas da Piedade
