DILI, 21 Agostu 2025 (TATOLI)—Diretór Nasionál Prevensaun no Kontrolu ba Moras La Hada’et iha Ministériu Saúde, Florindo Gonzaga Pinto, informa durante semana rua nia laran, Ministériu Saúde hamutuk ho Menzies iha Timor-Leste, liuhusi programa Wolbachia, husik susuk hamutuk 8,151 iha área risku sira iha kapitál Dili.
Notísia Relevante: Lansa programa Wolbachia, MS-Menzies husik susuk 2.000 iha Dili
“Husi implementasaun ne’e kuaze lubuk ida mak iha kapsula susuk nian, ita husik hamutuk 8,141. Husi implementasaun ne’e, hetan falla 32 ne’e, konsidera ba área sira-ne’ebé mak komunidade sira rejeita, rejeita iha ne’ebá uma balun, edifisiu eskola no mós edifisiu servisu balun tanba sira konsidera sira-nia fatin mós la presiza husik susuk,” Florindo Gonzaga Pinto, informa ba Jornalista sira iha Timor Plaza, ohin.
Nia esplika, ba susuk 32 ne’ebé mak nia implementasaun fallla ne’e, iha área Lesidere, Kolmera no Edifisiu Estadu balun inklui iha área Bairru-Pite tanba sira dehan iha sira-nia fatin ne’e susuk la iha, maibé Ministériu Saúde kontinua esforsu hodi sensibilzia informasaun ba komunidade.
“Maibé esforsu husi diresaun nian mak tenta halo ona karta atu haruka ba hodi nune’e sira na’in hira bele foti desizaun, purenkuantu edifisiu sira seluk hein despaixu husi edifisiu ne’e rasik,” nia dehan.
Iha komunidade balun rejeita tanba dehan sira-nia uma mós entaun ekipa koko atu husik susuk iha ne’ebá automatikamente sira rejeita. Maibé, husi parte Ministériu saúde la obriga no enkuantu haree katak nia efeitu nafatin iha, bainhira husik susuk iha viziñu sorin nia bele mai. ,
“Atu hateten de’it katak metru 50 ne’e kada titik ne’ebé husik, entaun nia sei iha implikasaun,” nia hateten.
Tuir nia, durante ne’e Ministériu Saúde halo sensibilizasaun implementasaun programa Wolbachia iha munisípiu Dili, katak bainhira sira husik susuk ne’e, susuk ba kaben fali ho susuk dengue, nune’e bele redúas kazu dengue iha rai-laran.
“Durante ne’e ita halo sensibilizasaun ne’e sira apar muito bem, sira hahú kedas nivel aldeia kedas mak sa’e mai. Iha momentu sensibilizasaun ne’e mós ita halo survey atu hatene katak komunidade hira mak rejeita no komunidade hira mak hakarak atu implementa programa ne’e. Purenkuantu 98,5 %, sira hakarak atu implementa maibé iha persentanjen kiik mak sira lakohi, entaun ita tenta halo aproximasaun ho komunidade no iha interevensaun ne’e mós iha ita-nia líder komunitária sira iha hotu laran atu eduka,” nia dehan.
Jornalista : Felicidade Ximenes
Editór : Cancio Ximenes
