OEKUSI, 21 Agostu 2025 (TATOLI) – Membru FALINTIL-Forsa Defeza Timor-Leste (F-FDTL) husi komponente navál Rejiaun Administrativa Espsiál Oekusi Ambeno (RAEOA) hamutuk ema na’in-ualu, kinta dadeer ne’e, hetan asidente ho karreta, hafoin hala’o patrullamentu ba Citrana suku Bene-Ufe sub-rejiaun Nítibe, maibé foin mak to’o área Uthau-Foo suku Suni-Ufe, karreta monu ba rai-naruk hodi rezulta na’in-tolu kanek todan no na’in-lima kanek kaman.
Jornalista Ajénsia TATOLI, I.P, asesu informasaun katak, hafoin akontese, serbisu ambulánsia to’o kedas fatin akontesimentu hodi halo transferénsia ba sala emerjénsia Hospitál Referál Oekusi hodi halo tratamentu intensivu.
Médiku Henrike Coa, ne’ebé responsavel ba tratamentu ne’e, esplika, hafoin to’o, ekipa médiku halo kedas atendimentu, maibé na’in-tolu hetan kanek todan no na’in-lima seluk kanek kaman.
“Informasaun mai husi baze katak, iha asidente króniku maibé masál – sira na’in-ualu, monu ho sira-nia karreta rasik, iha tuku 10:45 hanesan ne’e, sira mai to’o sala emerjénsia ne’e iha tuku 11:55. Ne’ebé, agora sira na’in-ualu, ami atende ona, na’in-tolu mak hetan kanek todan uitoan no na’in-lima kondisaun normál,” nia informa ba jornalista sira Hospitál Referál Oekusi, ohin.
Entretantu, Jornalista Ajénsia TATOLI,I.P tenta hala’o intervista ho Komandante Postu Navál Oekusi, Primeiru Sarjentu, Hendrike P.T Colo, maibé rejeita atu fó informasaun tanba laiha autorizasaun husi komandu nasionál.
Entretantu, tuir observasaun, Jornalista Ajénsia TATOLI,I.P, to’o tuku 14:00 lorokraik ne’e, membru F-FDTL na’in-ualu ne’e, sei kontinua halo tratamentu iha sala emejénsia Hospitál Referál Oekusi.
Jornalista: Abílio Elo Nini
Editór: Rafael Ximenes de A. Belo
