DILI, 23 Agostu 2025 (TATOLI)– Ekipa jigante kapitál Dili ho naran istimadu Karketu Dili FC kontinua selebra hikas nia títulu kampiaun iha Estádiu Munisipál Dili, sábadu kalan hafoin termina nia jornada ikus kontra ekipa Coraça.
Títulu ne’ebé Karketu hetan iha Liga Futeból Timor-Leste (LFTL) sai duni ona istória ba klube referidu, tanba úniku klube ne’ebé sai kampiaun dala-tolu tutuir-malu iha liga timor nian.
Jogu ikus ne’ebé Karketu enfrenta ho Coração nu’udar jogu hodi kompleta Karketu nia jornada iha époka 2025. Basa vitoria Karketu nian akontese ona hafoin ekipa ne’e hala’o jogu dala-ualu (8) kontra Emmanuel FC ne’ebé rezultadu empata 0-0.
Durante liga hahú, Karketu rasik mak loke odamatan iha Estádiu Manatutu ne’ebé kontra kedan ekipa AD SLB Laulara ne’ebé nu’udar mós ekipa jigante Munisípiu Auleu ne’ebé idéntiku ho naran istimadu Makikit Laulara ne’ebé sai kampiaun dala-uluk bainhira ezistensia Liga Futeból Amadora (LFA) iha tinan 2015-2016.
Biar nune’e, Karketu la hatudu nia frakeza, konsege hatudu luta ida ne’ebé extraordinariu hodi sona ku’ak, ekipa Makikit Laulara iha primeiru jogu ho rezulaadu 1-0. Husi vitoria ne’e loke dalan kedan ba ekipa Lakateu Dili ne’e iha nia jornada nunka lakon to’o sai kampiaun.
Enkuantu, iha jogu ikus kontra Coração minutu primeira parte hahú ekipa rua lansa kedan kontra no atake ba malu bainhira árbitru fó orientasaun iha kampo matak nia laran, tuir tékniku no abilidade ekipa idaidak nian ho ambisaun hakarak prodús golu hodi fó vitoria ba sira nia ekipa.
Jogadór sira anímu tebes, halai tuir idaidak nia maneira, pasa bola husi ain ba ain, halo jogu naruk no jogu badak, kosar habokon sira nia kamijola, maibé la hamate vontade ekipa rua nian hodi hala’o jogu ne’ebé bonitu hodi anima adeptus sira hotu ne’ebé tur haleu iha tribun Estádiu Munisipál Dili.
Adeptu ekipa rua (2) hakilar ho ida-idak nia jestu, balun hakilar klube nia naran no Karketu hakilar, Campione…..Campione…Campione.
Husi suporta ne’ebé iha halo jogadór sira iha vontade ne’ebé forte tebes hodi fintas bola ba mai husi ain ba ain.
Karketu koko halo atake maka’as ba Coração, maibé Coração la nonok, responde ho atake ne’ebé sempre hamate Karketu nia jogu husi lina ba lina, halo Karketu dada-iis la-di’ak, ikus iha minutu 38 sorte di’ak ba Coração liuhusi nia jogadór Lexy Atok lansa sutu ida halo guarda rede Karketu la antisipa no bola tama husi Guarda rede nia ain-leet hodi tama liu-ba rede laran ikus rezulta golu hodi muda rezultadu ba 1-0.
Husi golu ne’e halo Coração nia ritmu jogu aumenta maka’as husi lina ba lina, Karketu buka meiu hotu hodi rekoopera nia fallansu maibé Coração la fó fatin, ikus minutu primeira-parte termina vitoria hela provizoriu ba Coração.
Dolar ba segunda-parte, Karketu halo mudansa ba nia jogu husi lina karuk ba loos, konsege iha mudansa ne’ebé signifikativu tanba iha minutu jogadór Januario Fonseca konsege fura rede Coração hodi mida rezultadu nakfilak ba empata 1-1.
Husi fallansu ne’ebé Coração komete, treinadór muda kedan estratejia iha lina klaran halo jogu sai oinsaluk, sutu barak avansadu Coração halo maibé sutu hirak ne’e hela de’it hanesan sutu no sutu balu la kona iha alvu.
Coração halo esforsu ne’ebé maka’as tanba klube referidu ameasadu iha lina degradasaun ka zona mean, nune’e nia tenke manán jogu ne’e hodi haksoit sai husi zona mean ka zona degradasaun ba segunda divizaun.
Husi ne’e, Coração nia jogadór sira hala’o jogu ho unidade tebes iha kampo laran, sira halo jogu ofensivu maibé akompaiña mós ho jogu defensivu, ikus esforsu hirak ne’e la hela de’it hanesan esforsu tanba teki-teki iha minutu 90+2 jogadór Zeca Monteiro lansa golu ida hodi fó vitoria ba Coração ikus lori duni ekipa ne’e haksoit sai husi lina mean.
Nune’e minitu jogu nian termina vitória hela ba Coração, maibé Karketu mak sai hanesan kampiaun tanba rekolla pontu barak liu klube hotu iha Liga ne’e. Karketu kampuaun ho pontu hamutuk 20 no klube seluk nia pontu la to’o ho Karketu nian.
Tuir tabela klasifikasaun provizóriu ne’ebé iha Karketu mak tur iha liña primeiru ho pontu 20, segundu Emmanuel FC ho pontu 17, terseiru Porto Taibessi ho pontu 11, kuartu Assalam ho pontu 11, kintu Coração ho pontu 10, sestu AS Marca ho pontu 10, setimu DIT FC ho pontu sia (9), oitavu AD SLB ho pontu ualu (8), Nonu Academica FC ho pontu hitu (7), desimu AS Ponta Leste ho pontu neen (6), husi tabela ne’e hatudu katak Academica, SLB no Ponta Leste kandidatu forte atu degrada husi Primeira Divizaun ba Segunda Divizaun.
Istória badak kona-ba Karketu nia kampiaun
Karketu Dili FC hanesan klube ne’ebé sai kampeaun LFTL iha époka 2025, hafoin antes ne’e manan iha époka 2021 no 2023. Karketu Dili sai mós kampiaun Liga Futebol Amadora (LFA) iha tinan 2017.
Detallu kona-ba realizasaun Karketu Dili FC nian:
Kampeaun LFTL 2025:
Karketu Dili FC asegura títulu Liga Futebol Timor-Leste (LFTL) iha époka 2025 hafoin empata iha loron jogu ba dala ualu bainhira kontra nia adversariu AS Marca ho rezultadu 0-0.
Kampeaun LFTL 2023:
Karketu Dili FC mós manán LFTL iha époka 2022-2023. Kampeaun LFTL 2021 nian: Sira manán títulu LFTL 2021 hafoin kampaña liga nian ne’ebé maka’as.
Kampeaun LFA 2017:
Molok LFTL troka nia naran, Karketu Dili FC mós manán títulu Liga Futebol Amadora (LFA) iha tinan 2017.
Karketu Dili FC halo istoria hanesan ekipa dahuluk ne’ebé manan títulu tolu iha kompetisaun futeból Timor-Leste nian.
Jornalista: Hortencio Sanchez
Editór: Florencio Miranda Ximenes
