DILI, 25 Agostu 2025 (TATOLI)-Ministra Edukasaun, Dulce de Jesus Soares, hateten prezensa teknolojia dijitál la’ós substitui papél profesór sira-nian hodi lakon vontade atu hanorin estudante sira iha eskola, maibé uzu ba teknolójia dijitál mak atu hadi’ak prosesu ensinu aprendizajen, la’ós substititui ba servisu profesór ida-nian.
“Halo favór konsentra atu sempre uza pedagojia ne’ebé inkluzivu no efetivu, hodi asegura katak estudante sira aprende liuhusi aprendizajen ativu,” Ministra Edukasaun ne’e informa ba jornalista sira hafoin partisipa semináriu internasionál ne’ebé realiza husi Ministériu Transporte Komunikasaun no Operadór Te;ekomunikasaun Telkomsel, iha salaun Sentru Konvensaun Dili (CCD), Kaikoli, ohin.
Governante ne’e dehan, uza plataforma open source (google search) sira bele uza iha maneira kriativu hodi provoka estudante sira-nia interese, no mós maneira atu fornese instrusaun diferensiadu ba estudante sira-neʼebé karik presiza.
Tanba ne’e, nia husu ba estudante sira uza mídia sosiál no aplikativu sira seluk ho kuriozidade no mós kompaixaun, sai laran-di’ak no respeitozum dalabarak fasíl atu subar iha teknolójia nia kotuk no hakerek ka halo buat ruma ne’ebé hatún ema seluk nia dignidade.
Reprezentante profesór ensinu sekundáriu jerál Annur, Jaime Eco, hateten liuhusi plataforma Google ba setór edukasaun ne’e di’ak maibé ladun klaru entaun presiza mellora liután liuhusi halo sensibilizasaun ba iha kada eskola sira, atu nune’e estudante no mós manorin-na’in sira bele hatene no utiliza tuir nia dalan.
“Prezensa teknolljia nia benefísiu bele ajuda aumenta ema-nia skill no buka referénsia balun, maibé ba ha’u konsidera plataforma ne’e mós bele hamate ami-nia papél, tanba estudante ladun foku ona ho ami bainhira hanorin hela iha aula laran,” nia dehan.
Nia hatutan, bainhira estudante sira domina liu ona matéria husi google search, signifika sira mós ladun presiza ona prezensa husi profesór nian hodi hanorin sira, tanba sira garante liu ba google neʼebé fó informasaun ho fasíl no lalais.
Tanba ne’e, nia hateten, di’ak liu dirijente sira mellora liu ba profesór hodi hatene kle’an kona-ba google search for education hafoin fahe fali ba estudante sira.
Jornalista : Alexandra da Costa
Editór : Cancio Ximenes
