DILI, 28 Agostu 2025 (TATOLI) – Dezde inísiu operasaun Bank Rakyat Indonesia (BRI) iha Timor-Leste, iha 2017, fó ona kreditu ba kliente liu 2.500, ho montante akumuladu millaun $26.
Tuir Diretora Tezoureira no Negósiu Internasionál BRI, Farida Thamrin, dezempeñu ne’e reflete konfiansa públiku iha servisu BRI nian, ne’ebé hatudu katak banku ne’e komprometidu la’ós atu fó kréditu de’it, maibé ho oferta produtu hanesan poupansa, transferénsia, finansiamentu komersiál nian, no servisu tezouraria nian, nune’e responde ba nesesidade sira husi públiku no mundu negósiu nian.
“Iha 2017, ami iha ona lisensa bankáriu nivel B no ami mós atende públiku la’ós de’it iha empréstimu, maibé mós transferénsia, finansiamentu komersiál, no rastreabilidade produtu”, Farida dehan iha eskritóriu BRI Kolmera, ohin.
Nia hatutan katak dezempeñu banku nia kontinua hatudu tendénsia pozitiva. To’o Juñu 2025, BRI Timor-Leste akumula millaun $204 iha depózitu no fó ona empréstimu sira ne’ebé millaun $62, ne’ebé totaliza tiha hamutuk millaun $262 iha ativu.
Atu hadi’ak konveniénsia sira-nia servisu, BRI mós investe iha modernizasaun infraestrutura, ho instalsaun fatin ATM, introdusaun servisu bankáriu prioritáriu no habelar nia alkanse servisu liuhusi sukursál móvel rua iha Oekusi no Baukau, hodi servís di’ak komunidade sira iha área remota liu.
Jerente-Jerál BRI, Roby Firmansyah Sastraadmadja, subliña katak servisu BRI nian iha Timor-Leste ne’e komprensivu tebes, hahú husi poupansa no empréstimu to’o servisu remesa. Agora, banku konta ho postu atendimentu neen ne’ebé namkari iha fatin oioin.
“Ita mós iha ona kliente ne’ebé halo depózitu hamutuk iha banku liu rihun 5 no ba kliente sira ne’ebé asesu ona ba kréditu liu 2.500,” Roby hateten.
Nia reafirma kompromisu BRI kontinua habelar ninia rede, no hadi’ak kualidade servisu, ho apoiu husi Embaixada Indonézia no Governu Timor-Leste, kontribui nune’e ba dezenvolvimentu ekonómiku nasionál.
Iha sorin seluk, Embaixadór Indonézia iha Timor-Leste, Okto Dorinus Manik, reitera Governu Indonézia nia kompromisu atu kontinua kontribui ba dezenvolvimentu iha Timor-Leste, liuliu liuhusi atividade BRI nian.
“Ami nia esperansa mak BRI kontinua sai hanesan inovadór, motivadór, no klaru, hametin Timor-Leste nia ekonomia”, embaixadór hato’o.
Diplomata ne’e akresenta katak ho preparasaun Timor-Leste atu sai membru plenu ASEAN nian iha Outubru, BRI nia prezensa sei kontribui ba reforsa prontidaun finanseira iha nivel rejionál.
Notísia relevante: Xanana apela ba BRI dezempeña papél ativu iha promosaun dezenvolvimentu ekonómiku TL
Jornalista: Arminda Fonseca
Editora: Maria Auxiliadora
