DILI, 30 Agostu 2025 (TATOLI)–Governu liuhusi Ministru Administrasaun Estatál (MAE), Sábadu ne’e, organiza serimónia ofisiál komemorasaun Konsulta Populár ba dala-XXVI ho tema ‘Lori Pás bá Mundu’.
Ministru Administrasaun Estatál no Prezidente Komisaun Organizadora, Tomás do Rosário Cabral, konsidera, komemorasaun loron istóriku ne’e nu’udar momentu reflesaun no orgullu nasionál ne’ebé kle’an hodi fó onra ba povu timoroan nia determinasaun, ne’ebé iha loron 30 Agostu 1999 bá sentru votasaun hodi vota ho korajen no konviksaun ba independénsia no soberania.
“Ohin, 30 Agustu 2025, nu’udar loron ne’ebé halo ita hanoin hikas tinan 26 liubá, loron determinasaun ba timoroan hotu, hahú husi juventude ne’ebé ho idade 17, maun alin, feton nan, inan, aman to’o ferik no katuas sira, loron ne’ebé ita hotu hakat ho firmeza ba kaixa votu hodi fó ita-nia votu, hodi ohin loron ita hamrik hanesan Estadu independente ida iha Estadu seluk nia le’et,” Ministru Cabral, hateten iha Jardín Largu Lesidere, Bidau.
Ministru dehan, tema ne’e deskreve, maski Timor-Leste nu’udar illa ki’ik ida iha mundu nia matan, maibé Timor iha fuan ne’ebé boot tebes hodi hein husi tinan 1975 to’o mai tinan 1999. Durante períodu ne’e, timoroan hotu nafatin iha esperansa no aten brani hodi hateke ba oin maski iha difikuldade oioin, maibé la hakiduk ba kotuk.
Notísia relevante : Governu komemora loron Konsulta Populár ba dala-XXVI ho marsa saudável
“Ohin loron ita komemora Konsulta Populár ba dala-XXVI, iha momentu ne’ebé timoroan barak mak oras ne’e sai bá rai-li’ur ho motivu estudu, serbisu, bá hela iha ema-nia rain no seluk tan. Iha tempu hanesan, Estadu Timor-Leste mós sai bá mundu, liuhusi partisipasaun iha organizasaun internasionál sira nomós eventu espesiál iha vizita Papa Francisco nian mai Timor-Leste iha Setembru tinan 2024, ne’ebé komprova ba mundu katak timoroan nia unidade iha fé Katolika,” nia katak.
Tanba ne’e, Ministru konvida iha ámbitu komemorasaun loron istóriku ne’e, atu povu hotu hamutuk lori dezenvolvimentu ba rai doben ne’e.
“Mai ita hotu hamutuk, esforsu atu hamenus no halakon ki’ak ho esperansa ba moris di’ak. Buat hirak ne’e hotu, sei la mosu le’et de’it bainhira laiha amizade entre timoroan sira, husu ba sidadaun hothotu atu kontinua serbisu hamutuk ba nasaun nia progresu,” nia tenik.
Nune’e mós, Prezidente Repúblika, José Ramos-Horta, hateten, Timor-Leste hetan independénsia tanba parte hotu nia esforsu.
“Se la’ós Xanana aten-brani no matenek karik, referendu ne’e nunka akontese, maski iha momentu ne’ebá iha ameasa oioin no violénsia, Xanana hateten katak ba oin nafatin, referendu tenke halo, tanba momentu ne’ebá ONU ho Portugal hakarak hadi’a, maibé Xanana hatete bá oin nafatin,” Xefe Estadu konta tuir.
Jornalista : Arminda Fonseca
Editora : Julia Chatarina
