DILI, 30 Agostu 2025 (TATOLI)–Governu liuhusi Ministériu Administrasaun Estatál (MAE), Sábadu ne’e, realiza atividade marsa saudável hodi komemora loron Konsulta Populár ba dala-XXVI (30 Agostu 1999 – 30 Agostu 2025).
Marsa saudável ne’e realiza iha fatin rua, fatin konsentrasaun ba konvidadu no partisipante husi Postu Administrativu Kristu Rei no Na’in-Feto konsentra iha tasi-ibun Bidau Santa-Ana, (Sede Suku Bidau Santana nia oin) akompaña husi grupu Drum band husi Eskola Sekundária Cristal mai Largu Lesidere no fatin konsentrasaun ba konvidadu no partisipante husi Postu Administrativu Vera Kruz no Dom Aleixo konsentra iha Jardín Matael, akompaña husi grupu Drum band husi Eskola Sekundária Canossa.
Tuir oráriu, marsa saudável ne’e hahú husi tuku 14:00 lorokraik no ramata iha resintu Na’in-Feto Lesidere iha tuku 15:00, hafoin konsentra tiha iha tuku 15:30 hodi halo orasaun ne’ebé Prezide husi Arsebispu Arkidioseze Metropilitana Dili, Don Virgílio Kardeál do Carmo da Silva.
Iha orsaun ne’ebé Don Virgílio hasa’e ba Imaculada da Conceição, husu Nai’n-Feto nia tulun hodi tau-matan nafatin ba rai Timor hodi moris iha dame no domin laran.
“Timor nia Liurai Feto no ami-nia Protetora, ami fó omenajen ba Ita, ami lori povu no rai ida-ne’e nia naran. Husi Ita-Nia tulun hodi tau-matan nafatin mai ami no tulun rai ida-ne’e ho di’ak,” Don Virgílio Kardeál do Carmo da Silva, hateten iha Largu Bidau – Lesidere.
Notísia relevante : Komemora loron Konsulta Populár, Don Virgílio husu ukun-na’in sira hatudu unidade
Hafoin hasa’e orasaun, Kardeál do Carmo ho akompañamenutu husi Ministru Administrasaun Estatál, Tomas Cabral no partisipante sira, tau ai-funan iha Na’in-Feto.
Iha biban ne’e, marka prezensa mós husi membru Governu sira hanesan Ministra Saúde Élia Amaral, Ministru Interiór Francisco Guterres, Sekretáriu Estadu no Floresta Fernandinho Vieira, Ministru Administrasaun Estatál Tomás Cabral no seluk tan.
Partisipante, Emelita Pereira, konsidera, loron Konsulta Populár importante tebes ba povu Timor-Leste tanba husi loron ne’e mak povu brani hili auto-determinisaun.
“Maski iha momentu ne’ebá ha’u seidauk moris, maibé husi istória ne’ebé ami estuda no rona, hatudu katak ami-nia inan-aman no avo sira inklui eroi sira hatudu sira-nia brani hodi hili auto-determinasaun,” nia louva.
Nia dehan, hanesan joven atu luta fó kontinuidade ba rezultadu husi auto-determinasaun mak tenke kria pás, unidade no tenke estuda hodi kontribui dezenvolvimentu nasaun tanba funu ramata ona maibé dezenvolvimentu sei kontinua.
Jornalista : Arminda Fonseca
Editora : Julia Chatarina
