DILI, 01 Setembru 2025 (TATOLI) – Empreza PT. Valente Tirta Internasional, nu’udar produtór bee minerál ida husi Jakarta, no Aqua Fresca, empreza ida iha Timor-Leste,formaliza ohin akordu kooperasaun iha setór produsaun bee minerál iha Timor-Leste, iha ámbitu Dili International Trade Expo (DITE) 2025.
“Ami nu’udar empreza Air Mineral husi Jakarta hakarak kolabora ho Timor-Leste liuhusi Aqua Fresca, atu halo produsaun ba ami-nia marka iha ne’e, tanba ha’u haree katak sira-nia fábrika vizivel tebes hahú husi prosesu to’o finál“, reprezentante PT. Valente Tirta Internasional, Ahmad Hadari, hateten iha Sentru Kovesaun Dili (CCD, sigla inglés).
Tuir responsavel ne’e, empreza Valente Tirta hakarak halo kooperasaun ho Aqua Freska tanba empreza ne’e iha mákina produsaun ho padraun internasionál, ne’ebé fornese bee ne’ebé saudavel ba komunidade Timor-Leste.
“Importante tebes fornese bee minerál ho kualidade ne’ebé sufisiente ba povu Timor-Leste hodi konsume, tanba ne’e ha’u iha interese atu kolabora. Ohin ami asina (akordu), ami sei hahú serbisu iha tinan 2026″, nia adianta.
Tuir nia, empreza Aqua Fresca rasik iha mákina boot ne’ebé foin tama, entaun sei halo instalasaun, hafoin ida-ne’e mak foin serbisu hamutuk halo produsaun ba marka bee minerál iha Timor-Leste.
Nia dehan bainhira sira-nia marka bee minerál ne’e halo ona produsaun, sei komersializa mós iha Timor-Leste, maibé produtu ne’e sei prodús husi Fresca.
“Ami mós sei garante katak, bainhira Timor-Leste sai ofisialmente hanesan membru ASEAN, ami sei iha oportunidade hodi halo esportasaun bá Portugál no nasaun sira ne’ebé hanesan membru husi asosiasaun ho Timor-Leste”, nia informa.
Ahmad Hadar dehan kooperasaun serbisu ne’ebé empreza rua sei halo hodi bee minerál ne’e sei tau marka Valente Mineral Water.
Iha fatin hanesan, Diretór Ezekutivu Aqua Fresca, António Lay, hateten Valente Tirta hanesan empreza ida ho kualidade internasionál. Nune’e, empreza ne’e hakarak halo kooperasaun ho Fresca ne’ebé aprezenta husi ekipa TradeInveste.
“Ami kontente halo negósiu ho sira, tanba sira sei halo merkadu ba marka minerál ne’ebé sei komersializa iha Timor-Leste”, nia konklui.
Jornalista: Arminda Fonseca
Editora: Maria Auxiliadora
