VIKEKE, 14 Jullu 2026 (TATOLI)—Xefe Suku Vessoru, Postu Administrativu Uatulari, Munisípiu Vikeke, António de Almeida, informa Autoridade Suku Vessoru hamutuk ho lia-na’in no empreza implementadór realiza serimónia kulturál ba reabilitasaun Sítiu Turístiku Didimera.
António esplika objetivu husi serimónia kulturál ne’e atu husu lisensa, simu bensaun no protesaun husi beiala sira no rai-na’in hodi garante katak projetu la’o ho susesu no hakmatek, hodi prevene akontesimentu aat sira ba traballadór no komunidade lokál.
Autoridade komunitária ne’e hatutan reabilitasaun Gruta Didimera ne’e empreza responsavel destaka ona armazein no fasilidade sira seluk ne’ebé uza ba reabilitasaun nian.
“Maibé, ba servisu ha’u seidauk rona oráriu loloos. Ohin ne’e empreza kontinua mobiliza sira-nia ekipamentu iha armazein iha Gruta Didimera, depoiz ida-ne’e sira sei koordena traballadór sira atu hahú servisu,” António de Almeida ba TATOLI iha Postu Vikeke Vila, Tersa ne’e.
Nia esplika reabilitasaun Gruta Didimera empreza sei konstrui uma gazebo hamutuk unidade lima, iha-ne’ebé vizitór sira vizita karik bele túr, aleinde ne’e sei kontrui mós jardín iha gruta oin ho medida 200×50 no hadi’a gruta.
Projetu reabilitasaun ne’e orsamentu maihusi Autoridade Munisípiu Vikeke liuhusi Diresaun Planu Dezenvolvimentu Integradu Munisipál (PDIM) ba tinan 2026 nian, totál orsamentu $193.182,39, implementa husi Empreza MAKBES LIU DEH Unipessoal, Lda, durasaun hahú Jullu sei konklui iha Dezembru tinan ne’e.
Entretantu, serimónia kulturál ne’e partisipa husi autoridade lokál, tékniku empreza, veteranu, lian-na’in Suku Vessoru no komunidade.
Jornalista: Vitorino Lopes da Costa
Editór: Xisto Freitas da Piedade
