DILI, 01 Setembru 2025 (TATOLI)—Governu liuhusi Ministru Administrasaun Estatál, Tomás do Rosário Cabral, Segunda ne’e, fó ona pose ba Prezidente Autoridade Munisípiu (PAM) Dili eleitu, Fransisco dos Santos.
Biban ne’e, PAM Dili eleitu prioritiza ba pontu haat hodi solusiona problema iha sidade Dili.
“Ha’u iha prioridade haat, dahuluk engrafamentu ne’ebé sai problema ba ita no públiku, entaun ida-ne’e ha’u sei serbisu hamutuk Ministériu transporte no Komunikasaun (MTK) hodi haree ba estasionamentu nomós kona-ba alargamentu ne’ebé la’o hela presiza kria estasionamentu nune’e karreta sira labele para arbiru iha fatin públiku,” PAM Dili hato’o iha ámbitu serimónia tomada pose, iha resintu edifísiu Ministériu Administrasaun Estatál (MAE), Kaikoli.
Notísia relevante : Governu fó pose ba PAM Dili no Bobonaru
Seluk mak problema inundasaun, tanba tinan-tinan sempre iha inundasaun, tanba ne’e PAM foun hakarak halo koordenasaun di’ak liután ho parte Ministériu Obra Públika (MOP) nune’e bele haree baleta sira ne’ebé intupidu no hasai segimentasaun sira.
“Ida-ne’e mós ha’u envolve Autoridade Lokál nune’e bele orienta komunidade oinsá mak bele hamoos iha ida-idak ninia uma oin no soe foer iha nia fatin atu iha tempu udan bee bele la’o tuir nia dalan no labele iha inundasaun,” nia akresenta.
Programa datoluk mak infraestrutura ba ekonómia, liuliu ko’alia kona-ba merkadu.
“Ita iha merkadu boot rua, Manleu no Taibesi, ne’ebé ho nia kondisaun grave. Ho ida-ne’e kolabora ho Ministériu Komérsiu no Indústria bele rezolve lalais merkadu. Presiza kria kondisaun maibé tenke ho instituisaun relevante,” PAM katak.
Programa seluk mak kona-ba lixu, PAM Dili hakarak no iha planu atu koordena ho diretór munisipál hodi halo dezeñu ba sistema rute ne’ebé agora implementa ona iha Timor-Leste.
Jornalista : Osória Marques
Editora : Julia Chatarina
