OEKUSI, 03 Setembru 2025 (TATOLI) – Eis-Prezidente Autoridade Rejiaun Administrativa Espesiál Oekusi Ambeno (RAEOA), Arsénio Paixão Bano, rekomenda pontu rua ba Prezidente Autoridade Rejiaun Administrativa Espesiál Oekusi Ambeno (RAEOA) Koordenadór Zona Ekonómia Espesiál Dezenvolvimentu Oekusi Ambeno (ZEEDOA), Herculano Sousa katak hakuak ema hotu nu’udar Oekusi-oan no jere tempu progresa serbisu durante mandatu fulan tolu.
“Primeiru ha’u atu kongratula no felisita ba estrutura foun, husi Prezidente Autoridade RAEOA no Koordenadór ZEEDOA, tanba na’in-rua mesak Oekusi-oan, ha’u tenke apoia, atu lidera Oekusi. Maibé, ha’u-nia mensajén apoia katak fulan tolu ne’e badak liu parese iha renovasaun, di’akliu fokuliu ba buat ne’ebé bele halo durentu fulan tolu – buat ne’ebé labele halo, lalika esforsa tanba tempu ne’e badak liu, maibé importante liu mak buat rua de’it, hakuak Oekusi-oan hotu no jere tempu hatudu progresu serbisu,” nia ko’alia iha Oekusi, ohin.
Notísia relevante:Herculano Sousa prioriza asuntu tolu durante mandatu lidera ZEEDOA iha Oekusi
Kona-ba polítika, nia dehan, nu’udar partidu opozisaun FRETILIN iha Oekusi, sei apoia tanba antes ne’e, maioria Oekusi mak eskolla no rekomenda ba Primeiru-Ministru atu nomea Oekusi-oan rasik mak lidera Oekusi.
“Ha’u hanesan opozisaun FRETILIN apoia. Maibé, atu hili, loloos ema CNRT mak asumi kargu Prezidente Autoridade, maibé ne’e konforme lideransa CNRT liuliu Primeiru-Ministru mak hili Oekusi-oan ida, prontu ita apoia, maibé ba polítika haree ema hotu, ami opozisaun komprende maibé sira-ne’ebé parte ne’ebé daudaun ukun hela, tanba antes ne’e ita hotu inklui ha’u, ita hakarak ema Oekusi mak lidera,” nia katak.
Notísia relevante:Ba estrutura foun, Rogério Lobato: “Haree ema hotu hanesan timoroan”
Antes ne’e, iha reuniaun Konsellu Ministru, kuarta (27 Agostu 2024) ne’e, Governu liuhusi reuniaun Konsellu-Ministru aprova projetu rezolusaun ba ezonera estrutura hahú husi Prezidente no membru autoridade Rejiaun Administrativa Espesiál Oekusi Ambenu (RAEOA) iha 31 Agostu 2025.
Durante reuniaun ne’e, Primeiru Ministru Kay Rala Xanana Gusmão aprezenta rezolusaun kona-ba Rejiaun Administrativa Espesiál Oekusi Ambenu (RAEOA) atu disolve komisaun ezekutiva ho hanoin atu estabelese Zona Ekonómika Espesiál Dezenvolvimentu Oekusi Ambenu (ZEEDOA).
Iha dokumentu ofisiál portál Governu deklara katak, Governu sei ezonera Prezidente no membru autoridade RAEOA nian hahu iha 31 Agostu 2025 no nomea estrutura foun ida hodi garante kontinuidade administrasaun nian hahú iha 01 Setembru 2025.
Aleinde ne’e, Governu mos nomea hotu estrutura husi kargu diresaun no xefia sira iha Rejiaun Administrativa Espesiál Oekusi Ambenu (RAEOA) mak hanesan:
Domingos Punef assume knaar nu’udar Diretár-Jerál Rejionál; José Tanessib Anuno nu’udar Diretór Rejionál Administrasaun; Augusto de Fátima Efi nu’udar Diretór Rejionál Planeamentu no Aprovisionamentu; Amâncio Aguido Punef nu’udar Diretór Rejionál Finansas; Merita Marques Caunan Lafo nu’udar Diretora Rejionál Saúde; Vicêncio Cono nu’udar Diretór Rejionál da Edukasaun no Solidariedade Sosiál.
Nune’e mós Governu nomea José Oki nu’udar Diretór Rejionál Agrikultura; Orlando Quelo nu’udar Diretór Rejionál Komérsiu no Indústria; Remígio Nuno Sila nu’udar Diretór Rejionál Infraestruturas; Domingos de Almeida nu’udar Diretór Rejionál Transporte no Komunikasaun; Carlos de Fátima de Almeida nu’udar Diretór Rejionál Juventude no Desportu; Anastásia Eni nu’udar Diretora Rejionál Turizmu, Arte no Kultura; José Ase Neno Colo, nu’udar Diretór Rejionál Terras no Propriedade no Herculano Sousa mak asume kargu hanesan Koordenadór ba Implementasaun Zona Ekonómika Espesiál Dezenvolvimentu Oekusi Ambenu (ZEEDOA).
Jornalista: Abílio Elo Nini
Editór: Rafael Ximenes de A. Belo
