OEKUSI, 15 Abríl 2026 (TATOLI) – Ministériu Ensinu Superiór Siénsia no Kultura (MESSK), kuarta ohin, hala’o enkontru koordenasaun ho Autoridade Rejiaun Administrativa Espesiál Oekusi Ambeno (RAEOA) atu kontinua divulga informasaun ba estudante sira iha nível suku no aldea atu hetan oportunidade hodi asesu ba Universidade Nasionál Timor-Leste (UNTL) no Institutu Poletéknika Betanu (IPB) inklui bolsa estudu sira.
“Sorumutu ho Autoridade RAEOA ohin ne’e, nia objetivu primeiru atu hametin liña koordenasaun tanba funsionáriu husi MESSK destaka ona iha Oekusi, hodi haree asuntu edukasaun nian liliu ensinu superiór nian, ensinu superiór públiku; UNTL no IPB, no objetivu segundu, kona-ba divulgasaun informasaun kona-ba bolsa estudu,” Diretór Nasionál EnsinU Superiór Higino alves dehan, iha Oekusi, ohin
Nia informa, kada tinan númeru estudante husi Oekusi atu asesu ba UNTL no IPB menus, tanba ne’e MESSK rekomenda nafatin ba Autoridade RAEOA atu kontinua fahe informasaun to’o baze, nune’e ema hotu bele partisipa iha prosesu rejistrasaun.
Notísia relevante:MESSK introdus rekizitu legalizasaun diploma no estabelesimentu kursu foun iha Oekusi
Reprezentante Prezidente Autoriedade RAEOA João Bano Suni, konsidera koordenasaun ne’e importante, atu hametin liña koordenasaun nune’e kontinua divulga informasaun ba juventude sira iha Oekusi futuru bele asesu ba ingressu espesiál iha UNTL no IPB inklui bolsa estudu ba estranjeiru.
“Ezisténsia MESSK iha Oekusi importante, tanba kada tinan Governu halo rejistrasaun oinsá asesu ba ensinu superiór públiku sira no bolsu estudu, entaun Ministériu Ensinu Superiór nia destakamentu funsionáriu iha Oekusi importante atu ita hetan informasaun ho loloos,” nia hateten.
Notísia relevante:MESSK disemina kritériu rejime jerál no espesiál asesu UNTL-IPB iha Oekusi
Jornalista: Abílio Elo Nini
Editór: Rafael Ximenes de A. Belo
