OEKUSI, 18 Setembru 2025 (TATOLI) – Ministériu Ensinu Superiór Siénsia no Kultura (MESSK), kinta ne’e, disemina diploma ministeriál númeru 20/2025, loron 09 fulan Jullu kona-ba kritériu rejime jerál no espesiál atu asesu ba ensinu superiór públika Universidade Timor-Lorosa’e (UNTL) no Institutu Politéknika Betanu (IPB) ba entidade sira iha Rejiaun Administrativa Espesiál Oekusi Ambeno (RAEOA).
Nitísia relevante:MESSK rejista estudante 173 asesu ba rejime espesiál UNTL no IPB
Responsavel Tékniku husi MESSK, Sebastião Manuel Perreira, esplika katak programa desiminasaun ne’e, kada tinan Ministériu Ensinu Superiór hala’o iha munisipíu, atu partilla informasaun sira ba autoridade relevante sira, alvu ba estudante sira atu asesu informasaun hodi asesu ba ensinu superiór públiku UNTL no IPB.
Nia esplika, kona-ba rejime jerál prioridade ba kandidatu estudante ne’ebé ramata ensinu sekundáriu jerál no tékniku vokasionál iha tinan akadémiku 2025 no realiza ezame nasionál husi Ministériu Edukasaun (ME), inklui mellór estudante ka valór di’akliu, hamutuk 66 husi ensinu sekundáriu jerál no tékniku vokasionál.
Rejime espesiál, hanesan oportunidade, veteranu, veteranu nia oan no Mártir nian oan, hakbi’it, kandidatu sira ho defisiénsia fízika komprovadu tiha ona no sensoriál, pratikante desportista (desportista alta rendimentu), kandidatu sira-ne’ebé ramata ensinu sekundáriu iha eskola internasionál sira iha Timor-Leste, sidadaun sira Timoroan neʼebé ramata ensinu sekundáriu iha rai-li’ur, sidadaun sira estranjeiru neʼebé ramata tiha ona ensinu sekundáriu, diplomata (timor-oan sira-neʼebé hala’o misaun iha rai-li’ur ka Timor-Leste) no ninia família.
Hanesan mós ho diplomata estranjeiru sira-neʼebé hala’o misaun iha Timor-Leste no ninia família, kandidatu sira-neʼebé ramata tiha ona kursu ensinu superiór, kandidatu sira ho idade 23 ba leten, maske la ramata ensinu sekundáriu, ofisiál sira husi kuadru permanente F-FDTL, ofisiál sira husi kuadru permanente PNTL, kandidatu atu asesu ba IPB hare husi nia rezidénsia (munisipíu Aileu, Ainaro, Kovalima, Manatutu, Manufahi no Vikeke).
“Objetivu ida-ne’e mak MESSK ho ekipa husi ensinu superiór rua ne’e, ohin mai iha Oekusi atu partilla informasaun liuliu kritériu sira-ne’ebé mak presiza prepara, nune’e bainhira idak-idak fila ba fatin bele fahe tutan informasaun ne’e ba joven sira, atu bele asesu ba ensinu superiór ba tinan akadémiku 2026,” nia hateten iha salaun edukasaun Oekusi, ohin.
Nitísia relevante:MESSK-ME Portugál reforsa kooperasaun rejime asesu iha edukasaun ensinu superiór
Iha fatin hanesan, Superintendente Edukasaun Oekusi, Francisco Loka, reprezenta Diretór Edukasaun Oekusi, agredese, tanba sensibilizasaun ne’e presiza realiza antes, nune’e sidadaun hotu bele asesu informasaun hodi prepara atu konkorre.
“Tan ne’e mak ohin, ami konvida diretór eskola sira sira, tantu sekundáriu públiku, privada no tékniku vokasionál inklui jestór, xefe suku sira atu partisipa másimu, nune’e bainhira fila-fali ba sira-nia fatin bele fahe tutan tan informasaun ne’e, tanba tinan barak, Oekusi-oan atu asessu ba univesidade rua ne’e númeru ki’ikliu kompara ho munisipíu seluk aas, entaun ami agradese ba ministériu, tanba bele mai antes atu ami bele informa liután to’o baze,” nia orgullu.
Nitísia relevante:MESSK aloka rihun $400 hodi hadi’a infraestrutura ETCI no selu dosente
Entretantu, tuir kaléndariu husi MESSK, sei hahú halo inskrisaun iha loron 27 to’o 31 Outubru 2025, fatin inskrisaun iha resintu edukasaun munisipál idak-idak.
Jornalista: Abílio Elo Nini
Editór: Rafael Ximenes de A. Belo
