OEKUSI, 23 Jullu 2025 (TATOLI) – Ministériu Ensinu Superiór Siénsia no Kultura (MESSK), kuarta ne’e, hala’o diseminasaun kompeténsia Diresaun Nasionál Legalizasaun kona-ba rekezitu legalizasaun diploma, lisensa abertura kursu foun, no lisensa estabelesimentu instituisaun ensinu superiór foun, iha Rejiaun Administrativa Espesiál Oekusi Ambeno (RAEOA).
Xefe Departamentu Legalizasaun no Sertifikasaun Diploma iha MESSK, Emelita Maria Pereira, informa, programa diseminasaun ne’e, nia objetivu atu habelár informasaun ba públiku kona-ba sira-ne’ebé planu atu loke kursu foun ruma iha ensinu superiór sira.
Nune’e mós ba sira-ne’ebé iha interese atu loke instituisaun foun karik, bele hatene kona-ba kritéria no regulamentu sira, depois ba finalista sira-ne’ebé graduadu ona tantu rai-laran no rai-li’ur atu legaliza diploma karik, bele hatene kritéria sira.
“Tanba iha graduadu balu ba legaliza diploma iha Ministériu Edukasaun, barak la kompriénde kona-ba kritéria sira-ne’ebé iha, no sempre mosu problema, tan ne’e mak ami tuun ba munisipíu idak-idak atu habelár ba públiku atu kompriende no kumpre regra ne’ebé iha ona,” nia dehan.
Ezekutiva ne’e esplika, legalizasaun ka ratifikasaun ne’e, nu’udar prosesu ida atu deklara ofisialmente verasidade fotokopia diploma ka karta substituisaun diploma, liuhusi asinatura no karimbu ba iha diploma fotokopia liuhusi funsionáriu autorizadu.
Tanba objetivu jerál husi legalizasaun diploma ne’e, atu válida fotokopia dokumentu ida tuir ho lei ne’ebé vigór atu buka serbisu, kontinuasaun ba estudu no kompleta dokumentu serbisu.
Jerálmente, dokumentu ne’ebé legaliza mak dokumentu ofisiál sira hanesan, diploma, transkrisaun valór, sertifikadu husi exame nasionál no sertifikadu graduasaun.
Notísia relevante:MESSK sei avalia UNPAZ no DIT loke klase paralela iha Oé-Cusse
Iha fatin hanesan, Diretór Edukasaun Oekusi, Vincencio Cono, senti orgullu, tanba liuhusi diseminasaun ne’e bele regulariza universidade sira-ne’ebé loke sira-nia klase paralelu no klase ekstensaun iha Oekusi, no mós balun harii ona, atu iha kontrolu másimu ba kualidade ensinu superiór nian.
“Ne’e pasu importante atu bele loke dalan mós ba legalizasaun diploma, hanesan baxarelatu, lisensiatura bele mós legaliza de’it iha Sekretária Edukasaun no Asuntu Sosiál Oekusi, ne’e hanesan planu futuru ninian, duke husi Oekusi ba Dili gasta tempu to’o semana mak foin hetan legalizasaun iha nasionál. Iha parte ida, ami sente importante tebes tanba estudante sira, liuliu Oekusi iha ensinu superiór rua hanesan DIT no UNPAZ, atu-bele apar ho informasaun,” nia hateten.
Notísia relevante:MESSK disemina kritéria rejime jerál no espesiál asesu UNTL-IPB iha Oé-Cusse
Entretantu, tuir dadus ne’ebé MESSK rejista iha 2024, graduadu tantu rai-laran no rai-li’ur hamutuk 19.275 mak halo ona legalizasaun komposta husi feto 11.361 mane 7 914.
Partisipa iha desiminasaun ne’e, mai husi kargu xefia serbisu edukasaun Oekusi, akademiku husi Dili Institute of Technology Kampus Rejionál Oekusi (DITKREO), Universidade da Paz (UNPAZ) inklui profesór no estudante sira.
Jornalista: Abílio Elo Nini
Editór: Rafael Ximenes de A. Belo
