DILI, 06 Setembru 2025 (TATOLI) – Komandante Munisípiu Dili Superintendente Xefe Polísia Orlando Gomes hateten, polísia halo ona identifikasaun ba suspeitu na’in-haat ne’ebé envolve iha kazu tuda malu hodi rezulta lampu ne’ebé monta iha morru Embaixada Kambodia iha Markoni rahun.
Kazu konfrontu entre joven sira ne’e akontese iha Domingu (6/9) ohin – konfrontu entre grupu joven sira husi grupu tolu área Markoni aldeia 04 suku Fatuhada. Asaun tuda malu ne’e rezulta fatuk ba kona lampu ida-ne’ebé tidin iha morru Embaixada Kambodia iha Timor Leste ne’ebé lokaliza iha Markoni.
Hafoin akontesimentu, Prezidente Repúblika José Ramos-Horta akompañadu hosi Komandante Jerál PNTL Komisáriu Jerál Polísia Henrique da Costa no Komandante PNTL Munisípiu Dili Superintendente Xefe Polísia Orlando Gomes tuun kedan fatin akontesimentu no Xefe Estadu José Ramos- Horta no Komisáriu Jerál PNTL hasoru malu kedas Enkarregadór Kambodia ba Timor-Leste.
“Kazu ne’e rezulta husi joven grupu rua tuda malu iha área Markoni nian mak fatuk ba kona iha lampu tolu (3 ) ne’ebé tidin iha lutu Embaixada Kambodia ne’ebé mak lokaliza iha ne’ebá, no husi akontesimentu ne’e rezulta lampu tolu ne’ebé monta iha didin-lolon ne’e mak rahun no ba kazu ne’e polísia kaptura suspeitu nain-ha’at”, Orlando hateten ba TATOLI via telefone domingu ne’e.
Nia dehan, suspeitu haat ne’e nia inisiál nia parte seidauk hatene tanba foin submete ba prosesu identifikasaun.
“Suspeitu na’in-haat ne’e agora daudaun submete ona ba prosesu identifikasaun iha Diresaun Nasionál Servisu Investigasaun Kriminál”, nia informa.
Komandante Orlando fundamenta, agora daudaun suspeitu sira ne’e submete ona indentifikasaun hein rezultadu indentifikasaun ne’e karik atu detein ka lae ne’e depende ba prosesu.
Jornalista: Natalino Costa
Editór: Rafael Ximenes de A. Belo
