DILI, 10 Abríl 2026 (TATOLI)–Polísia Nasionál Timor-Leste (PNTL) liuhusi Servisu Investigasaun Kriminál apoia Polísia Baukau hodi ezekuta mandadu Tribunál Judisiál Primeira Instánsia Baukau hodi detein suspeitu AFB, ne’ebé halo krime violasaun sexuál hasoru vítima RdS iha Suku Uailili, Postu Administrativu Baukau Vila, Munisípiu Baukau, iha tinan 2020.
PNTL ezekuta mandadu judisiál ho númeru 0006/20.BCBCV hodi halo detensaun ba arguidu ho inisiál AFB hodi lori ba estabelesimentu Prizionál Bekora kumpre pena prizaun tinan-ualu.
AFB kondenadu ba krime violasaun sexuál ne’ebé previstu iha artigu 172 nomós komete krime autoria ne’ebé previstu no punidu iha artigu 30 husi Kódigu Penál Timor-Leste.
Nune’e, iha Kinta (09/04) tuku 08:00 dadeer Servisu Investigasaun Servisu Investigasaun Baukau apoiu husi Servisu Investigasaun Kriminál Nasionál ezekuta mandadu Tribunál Judisiál Primeira Instánsia Baukau hodi buka tuir kedan kondenadu AFB.
Notísia relevante : Servisu Migrasaun haruka fila sidadaun Indonézia komete violasaun sexuál
Iha operasaun ne’e, Servisu Investigasaun Kriminál identifika kondenadu nia fatin iha área Kaikoli, Aldeia Rumbia, Suku Kaikoli, Postu Administrativu Vera Krús, Munispiu Dili hodi tau kedan aljelma iha liman.
Hafoin ekipa investigasaun tau aljelma ba kondenadu AFB nia liman, nune’e lori kedan bá edifísiu Servisu Investigasaun Kriminál Nasionál hodi sertifika kedan arguidu molok lori bá Estabelesimentu Prizaun Bekora hodi kumpre pena tinan-ualu iha prizaun.
Diretór Servisu Investigasaun Kriminál Superintendente, Xefe Polísia João Belo, hateten, horisehik ekipa sira apoiu Komandu Munisípiu Baukau iha parte investigasaun hodi detein sidadaun balun.
“Hau seidauk hatene detallu, ha’u seidauk bele publika ba maluk sira iha dadeersan ida-ne’e,” João Belo hateten ba Jornalista sira iha ninia knaar fatin, Kaikoli, Sesta ne’e.
Jornalista : Natalino Costa
Editora : Julia Chatarina
