DILI, 10 Setembru 2025 (TATOLI)–Bispu Dioseze Dili, Don Virgílio Kardeál do Carmo da Silva, SDB relembra fali vizita Papa Francisco iha tinan-2024 atu hametin fiar Sarani Katólika iha Timor-Leste ba Maromak.
Don Virgílio Kardeál esplika dala-ida tan sarani sira halibur hamutuk fali hodi selebra misa iha Tasi-Tolu nu’udár jestu ida hasa’e asaun ba grasa hodi selebra aniversáriu dahuluk vizita Papa Francisco iha Timor-Leste.
“Liuhosi prezensa fraterna Papa Francisco nian, nia mai hodi hametin ita-nia fiar ba Maromak ho esperansa ba loron aban no haburas ita-nia karidade ba malu,” Don Virgílio Cardeál hateten liuhusi omília bainhira prezide misa selebrasaun vizita Papa Francisco tinan-ida iha Timor, iha Tasi-Tolu, Kuarta ne’e.
Notísia relevante: Igreja kontinua prepara misa selebrasaun aniversária vizita Papa Francisco iha TL
Líder Igreja ne’e relata Maromak haraik bensaun ba Timor-Leste liuhosi prezensa Papa Francisco iha-ne’ebé fó-sai lia-menon murak liuhosi jestu no umilde ne’ebé hatudu halo ema hotu sente katak Papa Francisco nia domin no atensaun ba povu Timor ne’ebé simples, fiar-na’in no hateten haksolok.
Nia haktuir, Papa Francisco deklara liuhosi espresaun domin sinseru ne’ebé hateten “Ha’u-nia laran monu ona ba Timor-Leste” bainhira haree ho matan fiar orijinál, haksolok ne’ebé auténtika no apoia ne’ebé estra-ordinária inklui domin timoroan ne’ebé puru fó ba Maktoban Papa Francisco.
“Iha rai ida-ne’e Papa aprende katak ksolok loloos maihusi ita ema ki’ak, simples no haraik aan sira,” Don Virgílio Kardeál akresenta.
Arsebispu Metropolitana ne’e lembra hikas diskursu Papa Francisco iha Igreja Katedrál Dili ne’ebé deklara maihusi rai dook ida, Arjentina, maibé Timor-Leste iha liu rohan no hakarak sai nu’udár sentru evanjellu nian ida-ne’ebé sai paradox atu timoroan sira atu aprende liuhosi evanjellu.
Entretantu, selebrasaun misa asaun ba grasa hodi selebra tinan-ida vizita Papa Francisco iha Timor-Leste hetan entusiazmu husi sarani, padre no madre inklui relijiozu sira ne’ebé tuir ajenda ramata misa sei kontinua ho vijília no konsertu ho tema ‘Joven Barullu’.
Rekorda fali katak vizita Papa Francisco iha Timor-Leste durante loron-tolu, 9-11 Setembru tinan-2024 ne’e maioria sarani Katólika husi territóriu prezensa iha misa santu purvolta rihun 700-resin.
Jornalista: Natalino Belo
Editór: Xisto Freitas da Piedade
