DILI, 16 setembru 2025 (TATOLI)–Komandu FALINTIL Forsa Defeza Timor-Leste (F-FDTL) no Polísia Nasionál Timor-Leste (PNTL), Kuarta ne’e, asina ona orden diretiva ba Operasaun Konjunta iha territóriu nasionál nune’e instituisaun rua ne’e bele hamutuk asegura situasaun rai-laran hodi garante pás no estabilidade ba povu no nasaun.
Orden diretiva ba Operasaun Seguransa Konjunta ne’e bazeia ba Rezolusaun Governu nú. 44/2025, loron 12 Setembru no karta ofisiál nu. 255/G-MI/XI/2024, loron 21 Novembru, ne’ebé sei implementa iha okaziaun serimonia ofisiál no komemorasaun sira, adezaun ba Asosiasaun Nasaun SudesteAziátiku (ASEAN, sigla inglés), serimónia ofisial ba komemorasaun tinan 50 Proklamasaun Independensia Repúblika Demokrátika Timor-Leste no selebrasaun natál no tinan foun.
Inisiativa ne’e ofisialmente asina husi Xefe Estadu Maiór Jenerál Forsa Armada (XEMGFA), Tenente Jenerál Domingos Raul Falur Rate Laek no Komandante Jerál PNTL Komisáriu Jerál Polísia Henrique da Costa, ne’ebé hala’o iha Kuartel Jenerál F-FDTL, Fatuhada, iha Tersa (16/09) lorokraik.
Tenente Jenerál Domingos Raul Falur Rate Laek hateten, rezolusaun ne’e hodi fó kompeténsia ba Komandu F-FDTL no PNTL hodi kontinua halo operasaun konjunta to’o janeru.
“Ne’e normál, situasaun emerjénsia hanesan tinan uluk vizita Amu Papa Francisco ho Sekretáriu Jerál ONU nian ho boot sira ne’ebé mak mai Governu halo nia dekretu mai Ministru hodi halo diretiva polítika mai ami atu elabora diretiva konjunta. Forsa rua nia papél mak importante hodi apoia Polísia. Ami sempre apoia seguransa afestada,” Tenente Jenerál hato’o ba Jornalista sira, iha Kuartel Jenerál F-FDTL, Fatuhada.
Notísia relevante : Aprova ona kompromisu operasionál konjuntu entre F-FDTL no PNTL
Nia dehan, ida-ne’e hanesan orden diretiva ba Operasaun Konjunta no regra empeñamentu, hafoin kria forsa tarefa konjunta hodi organiza lojístika atu apoiu iha terrenu.
Tenente Jenerál katak, manifestasaun ne’e responsabilidade Polísia nian, F-FDTL so bele tun terrenu bainhira iha situasaun la normál no hetan orientasaun husi Governu hodi fó apoiu.
“Manifestasaun normál, husu ba alin sira ne’ebé halo manifestasaun tenke tuir regra ne’ebé mak iha no pasífiku, labele halo violénsia, labele halo distruisaun no sunu uma,” nia akresenta.
Nune’e mós, Komandante Jerál PNTL Komisáriu Jerál Polísia Henrique da Costa haktuir, iha semana kotuk Governu hasai rezolusaun ida atu nune’e forsa rua bele serbisu hamutuk hodi nune’e bele asegura instalasaun vitál sira inklui bainaka sira ne’ebé agora vizita Timor-Leste no buat seluk tan.
Notísia relevante : Falur husu labele sunu no harahun propriedade Estadu
PNTL no F-FDTL sei hamutuk hodi fó seguransa ne’ebé di’ak ba situasaun ne’ebé daudaun la’o daudaun iha rai-laran.
“Ami sei fó seguransa másimu atu nune’e bele garante pás no estabilidade. Alin sira, sé imi hakarak halo imi-nia manifestasaun ami asegura ho di’ak liután,” Komandante Jerál hato’o.
Biban ne’e, Komisáriu Jerál Polísia husu ba manifestante sira atu labele tauk bainhira F-FDTL apoia PNTL hodi asegura manifestasaun ne’ebé daudaun ne’e Estudante Universitáriu Timor-Leste (EUTL), sosiedade sivól no entidade oinoin halo.
“Ba oin ne’e imi keta hanoin forsa tun ona ne’e tanba mai duni imi lae, ami serbisu hamutuk atu nune’e bele asegura di’ak liután,” nia tenik.
Jornalista : Natalino Costa
Editora : Julia Chatarina
