DILI, 19 Setembru 2025 (TATOLI)–Diretór Sekretariadu Tékniku Administrasaun Eleitorál (STAE) Munisipál Manatutu, Mariano Natalino Soares da Silva hateten STAE Manatutu atualiza ona eleitór 14.000-resin ba kartaun biométrika.
“Ita ko’alia kona-ba resensiamentu eleitorál no atualizasaun baze dadus ho baze biométriku, STAE Munisípiu Manatutu dezde inísiu hahú iha fulan-Outubru 2024 to’o mai ohin loron, ita konsege atualiza ona eleitór 14.000-resin,” nia dehan ba TATOLI via telefónika, Sesta ne’e.
Nia esplika, ba rejistu foun kuaze 1.000 no ema ne’ebé seidauk atualiza kuaze 23.000. Agora totál eleitór Munisípiu Manatutu hamutuk 38.000-resin.
Notísia relevante: Semana oin STAE atribui hikas kartaun biométriku hafoin suspende fulan-rua
“Agora daudaun ami sei suspende atividade atendimentu movel ne’ebé iha postu administrativu sira, maibé atendimentu iha Munisípiu Manatutu hanesan baibain de’it. Depoiz ami finaliza tiha atedimentu movel ba faze dahuluk ne’ebé hahú iha 28 Jullu to’o mai ohin loron, kuaze movel tama hotu ona,” nia haktuir.
Mariano hatutan atendimentu movel iha nivel postu administrativu ne’e hahú ona husi Postu Administrativu Laklo, Laklubar, Barike, Soibada, Laleia no Manatutu Vila.
“Daudaun ami prepara hela atu bá halo atendimentu faze daruak ba atendimentu movel iha postu administrativu. Tuir planu, semana oin halo koordenasaun ho postu administrativu sira nune’e hahú fali atividade movel iha postu administrativu sira,” nia dehan.
Entretantu, Mariano informa, STAE enfrenta dezafiu mak problema liña internet tanba atualizasaun ho biométriku presiza liña internet ne’ebé adekuadu, nune’e bele halo validasaun ne’ebé lalais liu.
Jornalista: Osória Marques
Editór: Xisto Freitas da Piedade
