VIKEKE, 22 Setembru 2025 (TATOLI)—IX Governu Konstituisionál liuhusi Ministériu Agrikultura, Peska, Pekuária no Floresta (MAPPF), lansa ona projetu irrigasaun Irabere, Postu Administrativu Uatukarbau, Munisípiu Vikeke sei fornese bee ba natar ektare 468.
Konstrusaun irrigasaun Irabere ne’e, atu responde ba preokupasaun komunidade agrikultura sira-nia nesesidade bá natar iha área parte Postu Administrativu Iliomar, Munisípiu Lautein no postu Uatukarbau, Munisípiu Vikeke tanba durante ne’e agrikultór sira utiliza ho irrigasaun manuál hodi difikulta fornese bee ba natar sira iha parte rua.
Prezidente Autoridade Munisípiu (PAM) Vikeke, Francisco Cruz Simões de Gonzaga Soares hato’o agradesimentu ba Governu tanba marka tan istória ida iha Vikeke tanba liuhusi irrigasaun ida-ne’e populasaun sira bele hasa’e produsaun hare.
“Ha’u lori povu Vikeke no Lautein nia naran hakarak hato’o agradesimentu ba Governu tanba husik hela buat furak ida ba jerasaun sira tuirmai. Lansamentu irrigasaun ida-ne’e sai hanesan istória di’ak ba ita-nia povu Munisípiu Vikeke no Munisípiu Leutein, ne’ebé esforsu husi Ministru Agrikultura, Peska, Pekuária no Floresta perkore iha munisípiu tomak hakarak hasa’e produsaun iha rai-laran,” Francisco hateten iha Postu Uatukarbau, Segunda ne’e.
Aleinde ne’e, Autoridade Munisípiu Vikeke ne’e solisita Governu hodi konstrui mós irrigasaun ida parte Suku Luka, Postu Vikeke Vila nian tanba iha-ne’ebá mós natar luan, maibé presiza irrigasaun atu agrikultór sira bele halo sira-nia natar, hodi hasa’e produsaun hare iha munisípiu Vikeke.
Iha fatin ketak, Xefe Suku Irabin de Baixo, José Baptista do Carmo haktuir daudaun ne’e empreza Xinés destaka ona sira-nia ekipamentu iha fatin konstrsusaun irrigasaun nian hodi prepara ba konstrusaun obra.
“Iha semana kotuk (20/09) Governu lansa projetu irrigasaun, ha’u haree empreza destaka ona sira-nia ekipamentu pezadu sira hanesan eskavatór no karreta iha fatin kontrusaun, no empreza komesa hamoos fatin armazein rua, atu rai sira-nia sasán. Depoiz armazein ne’e hotu, empreza dehan ba ami katak prosesu konstrusaun ne’e semana oin hahú ona,” nia esplika.
Kona-ba projetu irrigasaun Irabere ne’e konstrui husi Empreza Xineza husi Chingquing ho orsamentu $10.714.858, 26. Sistema irrigasaun ne’e ho naruk kilómetru 9,2 ne’ebé sei fornese bee ba natar ektare 468, durasaun konstrusaun hahú 2025 no sei ramata iha 2027.
Bainhira obra ne’e konkluidu sei benefísia natar ektare 118 iha Uatukarbau no ektare 350 iha parte Postu Iliomar, Munisípiu Lautein.
Jornalista: Vitorino Lopez da Costa
Editór: Xisto Freitas da Piedade
