DILI, 23 Setembru 2025 (TATOLI)—Sekretáriu Estadu Veteranu, César dos Santos da Silva “Merak” hateten Ministériu Asuntu Kombatente Libertasaun Nasionál (MAKLN) planeia ona atu haloot restu mortál hamutuk 222 iha tinan ne’e.
“Relasiona ho restu mortál ne’ebé mak MAKLN hanoin atu halo serimónia fúnebre iha tinan ida-ne’e, hahú ho númeru ne’ebé ki’ik iha munisípiu 3 hanesan Lautein iha urna 62, Manatutu Vila iha urna 105 no Likisá iha urna 55,” Merak dehan ba TATOLI iha nia kna’ar fatin, Kaikoli, Dili, Tersa ne’e.
Govenante ne’e hatutan Lautein nian sei haloot iha fulan-Outubru, Manatutu iha Novembru no Likisá iha Dezembru. Munisípiu seluk seidauk planeiadu tanba restu mortál númeru ne’ebé boot presiza orsamentu.
Notísia relevante: Restu mortál 10.726 mak sei iha uma-mahon munisípiu sira
Governante ne’e informa restu mortál ne’ebé seidauk haloot iha uma-mahon munisípiu sira hotu hamutuk 10.726.
“Ida ne’ebé haloot ona mak 1.989. Barak mak seidauk haloot. Nune’e, ami sei prepara kondisaun hodi bele haloot,” Merak tenik.
Nia haktuir Munisípiu Aileu iha restu mortál hamutuk 72, maibé ida-ne’ebé seidauk haloot ne’e iha rua de’it, tanba 70 haloot ona iha tinan 2022. Munisípiu Ainaru restu mortál iha 2.813 ne’ebé iha hela uma-mahon Ainaru, hein ninia prosesu fúnebre.
Munisípiu Baukau iha restu mortál 165 mak iha hela uma-mahon neʼebé seidauk haloot no haloot ona ne’e hamutuk 989. Munisípiu Bobonaru, iha 774 mak seidauk haloot.
Munisípiu Ermera restu mortál hamutuk 3.185, neʼebé Ekipa Jestaun Patrimónia halo identifikasaun ona, ne’ebé sei haloot iha Jardín Eroi Glenu ne’ebé agora daudaun hahú ona halo konstrusaun.
Munisípiu Kovalima iha restu mortál iha 779 neʼebé mak seidauk haloot. Munisípiu Díli iha restu mortál ne’ebé mak seidauk haloot iha 20, entretantu 672 haloot ona.
Munisípiu Lautein nian iha restu mortál hamutuk 239 ne’ebé seidauk haloot. Munisípiu Likisá restu mortál hela 74 mak seidauk haloot, no 259 mak haloot ona iha 2017 iha Jardín Eroi Likisá.
Munisípiu Manatutu iha restu mortál hamutuk 1.697 mak seidauk haloot, sei tomak hela, husi Natarbora mak maiória. Tanba ne’e mak prepara hela Jardín Eroi iha Kribas nian. Husi Munisípiu Manufahi iha 38, haloot ona haat no 34 mak seidauk. Munisípiu Vikeke restu mortál hamutuk 944 ne’ebé mak seidauk haloot.
Jornalista: Osória Marques
Editór: Xisto Freitas da Piedade
