DILI, 30 Setembru 2025 (TATOLI)—Konfrontu entre joven iha área Uaiaka, Mulia, Postu Administrativu Kelikai Antigu, rezulta uma abitante hamutuk haat hetan estragu.
Konflitu referidu akontese iha Segunda (29/09/2025), purvola 19h30, iha-ne’ebé seidauk hatene kauza husi akontesimentu.
“Uma abitante nian hamutuk haat mak rahun. Asaltu malu ne’e entre grupu, maibé akontese iha kalan ne’ebé ita seidauk hatene husi grupu ne’ebé-ne’ebé mak envolve,” Xefe Suku Uaitame, Celestino Morreira informa liuhosi telefónika, Tersa ne’e.
Celestino Morreira relata bainhira konfrontu ne’e akontese nia parte lahatene maibé hafoin observa no rekolla informasaun uma haat mak hetan estragu hanesan odamatan, vidru janela, kalén, kioske no kapela.
Celestino hato’o ona informasaun ba parte seguransa no suspeita grupu balun tanba antes ne’e iha joven balun husi área Tekinomata, Postu Laga hetan agregasaun fízika bainhira tesi fuuk iha parte Mulia.
“Ita-nia seguransa munisípiu ho FALINTIL-Forsa Defeza Timor-Leste (F-FDTL) kaptura ona joven balun,” Celestino akresenta.
Xefe Suku Uaitame husu ba Polísia Nasionál Timor-Leste (PNTL) atu toma-atensaun hodi hasa’e patrullamentu no destaka membru atu asegura situasaun tanba informasaun ne’ebé espalla iha possibilidade akontese tan iha área akontesimentu.
Jornalista: Natalino Belo
Editór: Xisto Freitas da Piedade
