DILI, 06 Outobru 2025 (TATOLI)—Prezidente Autoridade Rejiaun Administrativa Enklave Oekusi-Ambenu (RAEOA), Régio da Cruz, atualiza progreseu servisu durante fulan rua no mós planu programa prioridade sira-ne’ebé sei hala’o durante ninia mandatu iha Governu konstitusionál da-sia (IX) nian.
Prezidente Autoridade Rejiaun Administrativa Enklave Oekusi-Ambenu ne’e hala’o ninia mandatu hahú iha loron 01 fulan-Setembru no iha loron 30 fulan-Outobru 2025 foin lalais ne’e, ramata ona kontratu servisu ba fulan ida bazeia ba rezolusaun,
“Tanba ne’e, ohin, ami mai atu informa saida mak ami sei halo to’o loron 31 fulan-Dezembru, ami mós relata servisu saida mak ami konsege halo ona hanesan iha aktu administrativa, aktu obrigatóriu institusionál estruturál ne’ebé liga ba estrutura ezonera,” Atuál Prezidente Autoridade ne’e informa ba jornalista sira iha Palásiu Governu, ohin.
Nia afirma, durante mandatu fulan-tolu mai hanesan estratéjia ida atu hafanun sira-nia servisu ba povu no Governu.
“Ami mai hateten katak, ami la’o ona ho orientasaun Governu nian no povu Oekusi iha eransa ne’ebé di’ak hakarak reativa fali servisu protesaun estruturál no institusionál ne’ebé besik liu ba povu. Ami mós informa ba Primeiru-Ministru tanba interministeriál sira-ne’ebé ajuda ami reativa servisu institusionál nian,” nia dehan.
Nia hatutan, tenke kontinua ezersa obrigasaun Governu ba iha rai Oekusi, ho modu ida-ne’ebé responsável no dignu atu bele servisu iha povu nia oin, Oekusi-oan sira mós tenke iha hanoin ne’ebé krítiku hodi akompana prosesu Estadu foun hodi forma Oekusi sai rejiaun espesiál no atrai ema hotu.
“Iha programa prioridade tolu hanesan rezolve problema asesibilidade no konektividade sosiedade, servisu infraestrutura bázika ho karatéristika emerjénsia (ponte), tranzitória investimentu. Tanba ne’e, ami komprometidu ba Governu sentrál iha tinan 2026, ita tenke aselera lalais hodi dezenvolve infraestrutura bázika ba povu,” nia hateten.
Jornalista : Alexandra da Costa
Editór : Cancio Ximenes
