DILI, 07 Outubru 2025 (TATOLI)—Diretór Servisu Apoiu Diagnóstiku no Terapêutika HNGV, Vidal Lopes, klarifika durannte ne’e Hospitál Nasionál seidauk abandona kualker pasiente sira-ne’ebé mak halo tratamentu iha HNGV.
Nia hato’o kestaun ne’e hodi hatán preokupasaun husi bankada Frente Revolusionariu Timor-Leste Independente (FRETILIN) iha Parlamentu Nasionál ne’ebé mak hato’o lamentasaun kona-ba Hospitál Nasionál Guido Valadares kontinua abandona ema rezisténsia sira bainhira moras halo tratamentu iha ospitál.
“Hospitál Nasionál Guido Valadares la’ós halo tratamentu ba ema rezisténsia deit, maibé ba povu hotu-hotu tanba Hospoitál Nasionál Guido Valadares mak hanesan uma mahon boot ida iha Timor-Leste, ne’e la’ós fatin para halo diskriminisaun iha ne’e. Iha infomasaun ne’ebé ita-boot sira dehan diskriminisaun ba rezisténsia, laiha fatin atu halo diskriminisaun ba pasiente iha ne’e, maibé pasiente sé de’it mai halo tratamentu saúde ne’e ami fó tratamentu hanesan,” Vidal de Jesus hateten ba Jornalista sira iha nia kna’ar fatin, HNGV Bidau, ohin.
Nia esplika, pasiente hotu-hotu tenke hetan fatin dignu atu nune’e hodi hetan tratamentu dignu iha HNGV.
“Laiha dalan ami atu halo diskriminisaun. Bainhira veteranu ona, ho ema rezisténsia ne’e sira hetan tratamentu espesiál, tanba iha HNGV laran ne’e iha klínika veteranu ne’ebé mak fó tratamentu ba veteranu sira hodi halo atendimentu espesifiku ba ita-nia maluk veteranu, no ita-nia eróis sira lahalo diskriminisaun no la abandona ema ida iha ne’e,” nia dehan.
Nia dehan, HNGV seidauk abandona pasiente tanba ne’e husu ema hotu mai halo tratamentu saúde iha HNGV ho di’ak.
Jornalista : Felicidade Ximenes
Editór : Cancio Ximenes
