DILI, 08 Outubru 2025 (TATOLI)–Filme klásiku Indonézia “Asrama Dara” loke dahuluk hodi harame Festivál Internasionál Filme Dili (DIFF) Timor-Leste 2025, iha Sinema Platinum, Timor Plaza, tersa (07 Outubru 2025) ne’e.
Exibisaun filme ne’e organiza ho kolaborasaun husi Embaixada Indonézia iha Dili-Timor-Leste, Ministériu Kultura Indonézia no Rumah Kebudayaan Indonesia, tanba filme klásiku nu’udar kulminasaun ba diplomasia kulturál.
“Ami aprezenta Asrama Dara, obra ida tinan 1958 hosi Maestro Usmar Ismail. Filme ne’e importante tanba hatudu espíritu husi joven feto indonézia sira iha tempu inísiu independénsia nian,” Peritu Espesiál ba Ministériu Kultura Asuntu Diplomasia no Relasaun Internasionál Indonézia, Annisa Rengganis, hateten iha nia diskursu antes loke filme “Asrama Dara” iha Timor Plaza.
Exibisaun filme ne’e halo parte iha série Ativasaun Uma Kulturál Indonézia iha Timor-Leste, ne’ebé inklui programa prinsipál haat mak workshop gastronomia, workshop textil no diskusaun sira relasiona ho textil, workshop literatura no exibisaun filme klásiku nu’udar kulminasaun ba diplomasia kulturál.
Nia subliña, filme mak linguajen ida umanidade nian ne’ebé bele harii solidariedade, fahe esperansa sira no enkarna espíritu ida-ne’ebé fahe.
Artista vizuál indonéziu no membru Fórum Kuarentem, Hanif Alghifary, hatutan filme klásiku Asrama Dara hanesan obra importante ida iha istória sinema indonéziu nian, tanba introdús konseitu modernidade nian.
“Kalan ne’e hanesan momentu espesiál ida, ba dala uluk Asrama Dara hatudu ba públiku iha eventu ne’e. Mai ita haree hamutuk filmi ne’e,” nia hateten.
Eventu partisipa husi estudante, ativista arte, sidadaun Indonézia iha Timor-Leste, nune’e mós embaixadór husi nasaun ASEAN sira iha Dili no diplomata sira.
Filme klásiku “Asrama Dara” mak filme indonéziu klásiku ida-ne’ebé mak prodús iha tinan 1958 husi diretór Usmar Ismail, ida husi pioneiru sira husi sinema modernu indonéziu nian.
Filme drama ida-ne’e deskreve feto foinsa’e Indonézia sira-nia moris iha tempu inísiu independénsia nian, partikularmente iha dormitóriu ida-ne’ebé sira hasoru dezafiu pesoál, harii solidariedade no haburas sentidu komunidade nian.
Istória filme ne’e nian fó énfaze ba espíritu independénsia, edukasaun no papél feto nian hodi harii sosiedade foun hafoin proklamasaun independénsia.
Aleinde ninia signifikadu artístiku, Asrama Dara mós kaer signifikadu istóriku no sosiál, reflete aspirasaun joven indonéziu sira-nian iha dékada 1950 no hahú introdús konseitu sira modernidade nian liuhusi sinema.
Filme “Asrama Dara”
Filme klásiku “Asrama Dara” nu’udar filme muzikál Indonézia ne’ebé prodús iha tinan 1956 ne’ebé Usmar Ismail mak sai realizadór (sutradara), ho autór ka autora sira hanesan Aminah Cendrakasih, Baby Huwae, Bambang Hermanto, Bambang Irawaun, Chitra Dewi, Fifi Young, Nun Zairina, Suzanna no Rendra Karno.
Usmar Ismail moris iha 20 marsu 1921 no mate iha 02 janeiru 1971 ne’e, hanesan Realizadór Filme, Eskritór (sastrawan), Jornalista no Eroi Nasionál Indonézia. Ema konsidera nian hanesan Produsaun Sinematográfika iha Indonézia (Pelopor Perfileman iha Indonézia). Nia koñesidu hanesan fundadór ba Drama Moderna iha Indonézia no sai Aman Sinema Indonéziu.
Sinopse
Rezidente ba dormitóriu ne’ebé lidera husi Bu Siti (Fifi Young) iha problema ketak-ketak. Tari (Aminah Tjendrakasih), eniversitáriu ida, nia laran monu ba mane ida-ne’ebé ninia otas merese sai ninia aman, maske ninia kolega eskola, Yanto (Ismed M. Noer) tau laran (fuan) hela ba nia. Rahimah (Citra Dewi), kandidatu médiku ida, ne’ebé hetan obriga atu kaben iha ninia knua moris fatin, maibé hetan salba husi Masrul (Bambang Irawan).
Maria (Baby Huwae) hanesan aeromosa (pramugari) envolve iha “cinta segi empat”, ne’ebé Imansyah (Bambang Hermanto) nia laran monu ba nia, maib’e Maria gosta liu fali Broto (Rendra Karno) ne’ebé sai nu’udar komersiante ida, maibé Broto rasik hadomi liu profesora ba dansa. Sita (Nun Zairina). Envolve mós klosan na’in-rua, Anni (Nurbani Jusuf) no Ina (Suzanna), ne’ebé titip hela ba Bu Siti tanba ninia inan-aman ema politiku. Problema hirak ne’e rezolve ho komikamente.
Jornalista : Hortencio Sanchez
Editór : Cancio Ximenes
