DILI, 09 Outubru 2025 (TATOLI)–Jogu kontinuasaun faze Grupu A AFC Asian Cup 2027 entre ekipa Selesaun Nasionál Futeból Timor-Leste no Filipina sei determina pozisaun iha primeira klasifikasaun nune’e mosu pergunta, jogu referidu ekipa ne’ebé mak sei sai vensedór?
Istorikamente ekipa rua hala’o ona jogu daneen iha-ne’ebé ekipa Filipina mak sai dominante ho rezultadu manán dala-lima no Timor-Leste manán dala-ida.
Ekipa rua kontra malu bainhira partisipa kompetisaun iha rejionál Ázia hanesan Kopa Tiger iha tinan-2024 iha-ne’ebé ekipa Lafaek derrota ho skor 2-1, jogu daruak akontese iha Tasa AFF 2018, iha-ne’ebé Filipina manán ho skor mihis 3-2.
Notísia relevante: Treinadór Zé Pedro anúnsia lista jogadór selesaun nasionál na’in-32
Filipina konsege manán tan Timor-Leste iha eventu AFF 2020 ho skor ne’ebé boot 7-0, ne’ebé marka istória manán ho skor barak iha eventu Tasa AFF iha tempu ne’ebá.
Ekipa Lafaek úniku manán Filipina bainhira nasaun rua ne’e realiza jogu amizade internasionál iha tinan-2017 ho skor 1-0.
Haree head to head entre ekipa Timor-Leste no Filipina, tuir Komentatór Futeból, Joaquim Lopez Vide katak mezmu dezenvolvimentu futeból Filipina avansada ona maibé Timor-Leste hahú iha faze avansada tanba ho jogadór barak kompete ona iha rai-li’ur no agora treina husi treinadór prinsipál Zé Pedro ne’ebé konsideradu iha filozofia futeból modernu.
“Rezultadu husi jogu ne’e ekipa ne’ebé manán sei fortifika pozisaun dahuluk iha tabela klasifikasaun,” Joaquim Vide informa ba TATOLI iha Bairro dos Grilos, Kinta ne’e.
Ekipa rua sei hala’o jogu ronde datoluk iha-ne’ebé Timor-Leste nu’udár uma-na’in no tuir órariu sei hala’o iha Estádiu TRL Darwin-Austrália, 09 Outubru tuku 18:30, no jogu ne’e ba dahuluk antes Filipina sai fali uma-na’in iha loron-18 Outubru tinan ne’e.
Aleinde ne’e, bainhira haree ba FIFA World Ranking 2025 hatudu pozisaun Filipina okupa iha pozisaun 143 ho pontu 1066.35, enkuantu Timor-Leste okupa iha pozisaun 194 ho pontu 855.36 husi totál nasaun membru hamutuk 210.
“Ha’u fiar katak ita-nia ekipa sei hala’o jogu ho vontade di’ak hodi fó kontente ba povu Timor,” Joaquim Vide subliña.
Entretantu, Grupu A hamutuk nasaun haat hanesan Tazaskistaun, Timor-Leste, Maladewa no Filipina, iha-ne’ebé Timor-Leste okupa iha pozisaun datoluk ho pontu tolu (3), rezultadu husi jogu rua kompostu manán ida (1) no derrota ida (1), enkuantu Filipina iha pozisaun daruak, rezultadu husi manán ida (1) no impata ida (1).
Pozisaun dahuluk okupa husi ekipa Tazaskistaun ho pontu haat (4), manán ida (1) no impata ida (1) no Maladewa mak okupa iha pozisaun ikus ho pontu 0, rezultadu husi derrota dala-rua.
Jornalista: Natalino Belo
Editór: Xisto Freitas da Piedade
