BOBONARU, 14 Outubru 2025 (TATOLI) – Sekretariu Estadu Komunikasaun Sosiál (SEKOMS) no Konsellu Imprensa servisu hamutuk ho Operadór Telekomunikasaun TELKOMSEL, tersa ne’e, realiza atividade mini-semináriu hodi sensibiliza literasia mediatika ba estudante Ensinu Sekundáriu Jerál Filiál Dom Martinho da Costa Lopes Balibo, Munisípiu Bobonaru iha ámbitu komemorasaun loron trajédia ‘Balibo five’ ba da-50 no loron liberdade imprensa ba da-tolu.
Prezidente Komisaun Organazadora, Antonio Dias,esklarese atividade ne’e realiza atu hasa’e estudante nia konsiénsia sai formadu, informadu kona-ba oinsá perigu husi desinformasaun no konsiensializa sira sai krítiku iha uzu ba asesu plataforma dijitál.
“Hahú iha 2010 mai leten ne’e ita tama iha dijitál. Iha Timor-Leste ita mai ho ida analog ne’e. agora iha tranferénsia dijitál ita mai to’o iha Era Intelijénsia Artifisiál, importante tebes ita-nia joven sira atu hatene oinsá uza meiu dijitál sira ne’e kritikamente para depois fahe informasaun sira ne’e utíl ba ita-nia sosiedade ba sira nia aan rasik asesu ba ita-nia plataforma sira ne’e para depois ikusmai bele ajuda partilla informasaun sira ne’ebé di’ak, edukativu, kontribui ba sosiedade ida edukadu, krítiku iha uzu plataforma dijitál,” nia informa ba Jornalista sira iha kampu Balibo, ohin.
Jerente Kooperasaun no Komunikasaun Telkomsel, Joanina Pereirra, reforsa TELKOMSEL nia prezensa iha eventu ne’e atu eduka foinsa’e sira atu bele iha koñesimentu ba iha utilizasaun pakote internet ne’ebé asesu matéria eskola no informasaun sira ne’ebé iha vantajen di’ak.
“Empoderamentu ba dijitál ne’e importante no presiza tebes atu sensibliza informasaun ba estudante sira tanba estudante no joven sira mak sai autór ba iha dezenvolvimentu nian. Ajente ba mudansa iha setór ida-ne’e,ita hotu hatene katak ita hatene katak era dijitál ne’e mai ho forsa ida maka’as liu. Ita akompaña iha Nepal karik krize boot ne’ebé akontese ikusmai sira hili sira nia Primeiru-Ministru liu de’it husi Aplikasi ida (Aplikasaun discord), ne’e hatudu katak tempu ida agora presiza tebes ita-nia koñesimentu atu nune’e ita laiha tan literasia ba dijitalizasaun,” nia esplika no kompara.
Iha biban ne’e, Profesór Eskola ESG Dom Martinho da Costa Lopes Balibo, João Martins, agradese ba governu no TELKOMSEL no konsidera atividade importante tebes tanba estudante mak sai matadalan ba futuru.
Nune’e mós rekomenda ba SEKOMS atu establese jornál parede dijitál iha ESG Balibo. “Fatin ida-ne’e maski simples maibé fatin ida-ne’e mak halo rai ne’e nia naran morin iha mundu tomak,” nia hakotu.
Enkuantu atividade ne’e hetan partisipasaun másimu husi estudante sira.
Notisía relevante:TLPU organiza formasaun “Literasia Mediátika no Mudansa Klimátika” ba Jornalista sira
Jornalista:Sergio da Cruz
Editór: Rafael Ximenes de A. Belo
