BOBONARU, 16 Outubru 2025 (TATOLI) – Prezidente Autoridade Munisípiu Bobonaru, Paulo Moniz Maia, hato’o sentidu lutu ba família matebian Jornalista na’in-lima ne’ebé mate ho kruelidade iha akontesimentu trajédia Balibo five iha tinan-1975.
PAM Bobonaru afirma, trajédia ida-ne’e la’ós hela de’it ba istória ida maibé ita-nia memória no konsiderasaun hodi foti loron ida-ne’e ba Liberdade imprensa maibé trajedia nia hodi hatudu sira na’in-lima nia sentidu umanizmu, durante périodu ida nakukun tebes.
“Hato’o sentidu família sira husi na’in-lima ne’ebé sira husik hela. Hau-nia hakruuk no agradese tanba imi bele mai atu ita komemora hamutuk loron ida-ne’e, komemorasaun ida-ne’e hodi ita haree hamutuk hodi hametin relasaun ema ho ema entre nasaun Timor-Leste no Austrália,” Autoridade Bobonaru hateten liuhusi intervensaun ba atividade Balibo House Trust iha ámbitu komemorasaun loron Balibo five ba da-50.
“Sira na’in-lima mak lakon ne’e mós hanesan timoroan rihun atus rua lima nolu-resin ne’ebé lakon tanba invazaun Indonézia sira. Sira-nia sakrifísiu lori ba aktu kruel sira no kontra Direitu Umanu,” nia konsidera.
Antigu Deputadu ne’e mós husu ba Sekretariu Estadu Komunikasaun Sosiál (SEKOMS), Konsellu Imprensa Timor-Leste (CITL, sigla portugés) no Sentru Nasionál Chega (CNC, sigla portugés) atu inklui iha planu ba oin hodi dezenvolve Balibo Five, alende dedika mós sentru memoriál ba jornalista estranjeiru na’in-lima ne’e hodi tulun bele sai mós sentru turístiku atu bele atrai vizitante internasionál sira.
Governu mós presiza tau-matan ba servisu komunitária sira iha Balibo hanesan sentru memoriál.
“Ha’u-nia esperansa Muzeu Nasionál no CNC bele hare’e ba oin hamutuk ho PAM dezenvolve fatin ne’e sai muzeu ida atu atrai di’ak liután vizitante husi rai-li’ur no rai-laran alende ne’e sira mós bele sente Balibo Foho no Bee Manas Marobo no mós Sentru Geo Turizmu iha foho Lesululi Kailaku,” nia otimista.
Ba Embaixada Austrália, PAM Bobonaru husu atu bele haree mós família ne’ebé husik hela, iha konkretizasaun atu halo fatin ne’e di’ak liután.
Notisía relevante:Claire: Balibo Five fó hanoin kona-ba importánsia ba seguransa jornalista
Jornalista: Sergio da Cruz
Editór: Rafael Ximenes de A. Belo
