KOVALIMA, 20 Outubru 2025 ( TATOLI)-Autoridade komunitáriu hosi suku Fohorem munisípiu Kovalima, Julio Ferreira Alves, husu ba Servisu Munisípiu Agrikultura Kovalima atu promove produtu lokál ne’ebé maka beiala-sira rai hela to’o ohin loron.
“Ita persiza kontinua promove produtu lokál ne’ebé ita-nia bei-ala sira husik hela ba ita hanesan tora ,hare metan no seluk tan, tanba ita haree buat sira ne’e besik atu lakon ona,” nia hato’o asuntu ne’e ba jornalista sira iha Kovalima.
Tuir-nia produtu lokál hirak ne’e, daudaun ne’e hahú mohu iha Kovalima, tanba ne’e, Ministériu Agrikultura Peska Pekuária no Floresta (MAPPF), liuhosi Servisu Munisipál Agrikultura persiza promove produtu hirak ne’e ba jerasaun foun sira iha futuru.
“Ita presiza kontinua habelar fali produtu lokál ne’ebé bei-ala sira husik mai ita entaun ita buka fini nune’e ita bele kontinua promove produtu sira ne’e atu labele lakon tanba produtu favóritu tebes,” nia
Hatan ba kestaun ne’e, Diretór Servisu Munisipál Agrikultura Kovalima, Lino Magno dehan lideransa komunitária maka organiza agrikultór sira atu oinsá identifika produtu lokál sira ne’ebé ameasa lakon no depois maka servisu agrikultura Kovalima elabora ba planu ida hodi bele promove.
“Ita-boot sira maka organiza agrikultór sira atu promove produtu lokál ne’ebé maka bei-ala husik mai ita maka hanesan hare rai maran no sira seluk tan, hafoin maka tau iha planu maibé daudaun ne’e ita laiha planu no atu kontinua promove ida-ne’e ita boot sira maka organiza povu hafoin ha’u kontinua promove liuhosi planu ne’ebé maka ha’u aprezenta,”nia dehan.
Tuir dadus husi Servisu Munisipál Agrikultura Kovalima,rejista totál produsaun hare kulit tinan 2025 iha munisipiu Kovalima kompostu hosi postu administrativu Zumalai, Tilomar, Fatumea no Suai hamutuk tonelada 3.013.
Jornalista:Celestina Teles
Editór:Florencio Miranda Ximenes
