DILI, 23 Outubru 2025 (TATOLI)—Komisaun Antí-Korrupsaun iha tinan 2024 to’o 2025 konsege konklui ona investigasaun ba kazu korrupsaun hamutuk 26.
Komisáriu CAC, Rui Pereira dos Santos esplika, instituisaun ne’e hetan kompeténsia husi Ministériu Públiku (MP) hodi halo investigasaun ba kazu korrupsaun hamutuk 12 iha tinan 2024 no kazu hamutuk 36 iha tinan 2025.
“Totál kazu iha 48, ita konklui ona investigasaun no haruka ona ba Ministériu Públiku hamutuk 26,” Komisáriu CAC hateten ba Jornalista sira hafoin halo audiénsia públika ho Komisaun A ne’ebé trata asuntu Justisa no Konstitusionál iha Parlamentu Nasionál (PN) hodi aprezenta orsamentu tinan 2026, Kinta ne’e.
Notísia relevante : KAK solisita adisionál hodi apoiu investigasaun kriminál
Kazu sira ne’e maioria administrasaun danoza, krime ativa, krime pasiva abuzu poder, no partisipasaun ekonomia iha negósiu.
“Agora kazu ne’e iha ona MP agora hein bainhira mak atu atribui fali mai kompeténsia sira-nian. Ami-nia kompeténsia iha investigasaun kriminál,” nia akresenta.
Iha biban ne’e, Komisáriu CAC mós informa katak bazeia ba ekipa nia vizita surpreza ba projetu ne’ebé finansia ho orsamentu Estadu iha territóriu tomak, nota katak projetu barak mak abandona.
“Hanesan projetu eletrisidade iha Ermera antes ne’e empreza abandona, maibé ho prezensa CAC nian agora ahi lakan ona iha komunidade nia uma,” nia katak.
Jornalista : Natalino Costa
Editora : Julia Chatarina
